Shymkentte qoǵamdyq kólik parki jańaryp keledi
ShYMKENT. KAZINFORM — Shymkentte qoǵamdyq kólik qyzmetiniń sapasyn arttyrý baǵytyndaǵy jumystar kezeń-kezeńimen jalǵasyp keledi.
Qalada jolaýshylarǵa qolaıly jaǵdaı jasaý, kólik ınfraqurylymyn jańǵyrtý jáne avtobýstar parkin zamanaýı tehnıkalarmen tolyqtyrý — jergilikti bıliktiń basym baǵyttarynyń birine aınalǵan. Osy maqsattaǵy jumystardyń nátıjesinde qaladaǵy qoǵamdyq kólik parki taǵy da jańa avtobýstarmen tolyqty.
Shymkent qalasynyń ákimi Ǵabıt Syzdyqbekov «Bozjorga Bus» jaýapkershiligi shekteýli seriktestiginiń jumysymen tanysý barysynda jańa avtobýstardyń áleýetin de kórip shyqty. Qalaishilik baǵyttarǵa qyzmet kórsetetin tasymaldaýshy kompanııa avtoparkine osylaısha taǵy da 17 zamanaýı avtobýs qosyldy. Qala basshysy qoǵamdyq kólik júıesin jańǵyrtý — turǵyndarǵa kórsetiletin qyzmet sapasyn arttyrýdyń mańyzdy tetigi ekenin atap ótti. Onyń aıtýynsha, qoǵamdyq kólik eń aldymen qaýipsizdik, jaılylyq jáne qoljetimdilik talaptaryna tolyq saı bolýy tıis. Sondyqtan avtobýs parkin kezeń-kezeńimen jańartý jumystary aldaǵy ýaqytta da jalǵasa beredi.
Jańa avtobýstar 14 tamyzdan bastap áleýmettik mańyzy bar № 72 baǵytta jolaýshylarǵa qyzmet kórsete bastady. Bul baǵyt qaladaǵy turǵyn alaptaryn áleýmettik nysandarmen, bilim berý jáne densaýlyq saqtaý mekemelerimen, sondaı-aq iri saýda ortalyqtarymen baılanystyrady. Osylaısha jańa avtobýstardyń iske qosylýy kúndelikti qatynaıtyn myńdaǵan turǵyn úshin qolaıly jaǵdaı qalyptastyrýǵa múmkindik beredi. Jańa tehnıkalardyń basty ereksheligi — olardyń zamanaýı talaptarǵa saı jabdyqtalýy. Avtobýstar tómen edendi platformamen qamtamasyz etilgen. Sonymen qatar qozǵalysy shekteýli azamattar men balalar arbasyn paıdalanatyn jolaýshylarǵa arnalǵan arnaıy pandýstar ornatylǵan. Bul qoǵamdyq kóliktiń barlyq sanattaǵy turǵyndar úshin qoljetimdi bolýyna jaǵdaı jasaıdy.
Qoǵamdyq kólikti jańartý jumystary munymen shektelmeıdi. Qyrkúıek aıynda «Shymkent Bus» kompanııasy qala baǵyttaryna taǵy 31 jańa avtobýs shyǵarýdy josparlap otyr. Olar búgingi kúni paıdalanylyp júrgen eskirgen Ankai markaly avtobýstardyń ornyn basady. Bul óz kezeginde tehnıkalyq aqaýlardy azaıtyp, jolaýshylarǵa kórsetiletin qyzmettiń sapasy men qaýipsizdigin arttyrýǵa yqpal etedi.
Jalpy, Shymkentte avtobýs parkin jańartý júıeli túrde júzege asyrylyp keledi. Bul jumystar turǵyndardyń qoǵamdyq kólikke degen suranysyn sapaly qamtamasyz etýge, jolaýshylar tasymalynyń tıimdiligin arttyrýǵa jáne qalanyń zamanaýı kólik ınfraqurylymyn damytýǵa baǵyttalǵan. Zamanaýı avtobýstar sanynyń artýy ekologııalyq ahýaldy jaqsartýǵa, kólik qatynasyn tıimdi uıymdastyrýǵa jáne megapolıs turǵyndarynyń kúndelikti ómir sapasyn kóterýge de oń áserin tıgizedi.
