Shymkentte qyzmetkerlerdiń jalaqysyn tólemegen kásiporyn basshysy jaýapkershilikke tartyldy

ShYMKENT. KAZINFORM – Shymkentte qyzmetkerlerdiń jalaqysyn tólemegeni úshin kásiporyn basshysy ákimshilik jaýapkershilikke tartyldy. 

Qalalyq prokýratýranyń baspasóz qyzmeti málimdegendeı, «Sport ǵımarattary dırektsııasy» 203 qyzmetkerdiń eńbekaqysyn tólemegen. Oǵan aıyppul salyndy.

«Shymkent qalasy prokýratýrasynyń taldaýymen qalalyq dene shynyqtyrý jáne sport basqarmasynyń «Sport ǵımarattary dırektsııasy» MKQK-nyń 203 qyzmetkerdiń aldynda 24 mln teńge somasynda jalaqy boıynsha qaryzy anyqtaldy. Prokýrorlyq qadaǵalaý aktisi boıynsha jumyskerler aldyndaǵy jalaqy tolyǵymen óteldi, kásiporyn basshysy QR ÁQBtK-niń 87-baby boıynsha ákimshilik jaýaptylyqqa tartyldy, oǵan 20 AEK (73 840 teńge) mólsherinde aıyppul salyndy», - delingen habarlamada.