Shymkentte qyzyn aıaýsyz urǵan áıelge qatysty qylmystyq is qozǵaldy
ShYMKENT. KAZINFORM – Kámeletke tolmaǵan qyz qazirgi ýaqytta ákesiniń qamqorlyǵynda.
Úı ishinde qyzyn aıaýsyz urǵan áıeldiń áreketi áleýmettik jelide keńinen tarap ketti. Tipti, pyshaq taqap, basynan shelekpen urǵan sáti kameraǵa anyq túsip qalǵan. Jasóspirim qyzynyń aıqaılap jylaǵanyna qaramastan betinen judyryqpen uryp, basynan tepken. Sondaı-aq, bul áreketin birneshe márte qaıtalaǵan.
Shymkent qalasy Polıtsııa departamentiniń baspasóz qyzmeti atalǵan jaǵdaıǵa qatysty qylmystyq is qozǵalǵanyn málimdedi.
«Polıtsııa qyzmetkerlerimen beınejazbada kórsetilgen adamdar anyqtaldy. Atalǵan jaıt boıynsha 2024 jyldyń 31 naýryzynda qylmystyq is qozǵaldy. Áıeldiń birinshi nekesinen týǵan jábirlenýshi kámeletke tolmaǵan qyz qazirgi ýaqytta ákesiniń qamqorlyǵynda. Tergeý áreketteri júrgizilip jatyr. Saraptama taǵaıyndaldy. Іs Shymkent qalasy Polıtsııa departamenti bastyǵynyń baqylaýynda» - delingen vedomstva aqparatynda.
