Shymkentte qyzylshanyń órshýi men aýrýhanalardyń tolýy týraly aqparat joqqa shyǵaryldy

ASTANA. KAZINFORM — Áleýmettik jelilerde taraǵan Shymkentte qyzylsha aýrýy órship, aýrýhanalarda oryn jetispeı jatyr degen aqparat rastalmady. Shymkent qalalyq densaýlyq saqtaý basqarmasy qaladaǵy epıdemıologııalyq jaǵdaı turaqty ekenin málimdedi, dep habarlaıdy Kazinform tilshisi.

Alańdaýshylyqqa áleýmettik jelilerde jarııalanǵan jazbalar sebep bolǵan. Onda Shymkenttegi aýrýhanalar lyq toly, bos palatalar joq, al balalar arasynda qyzylsha derekteri kóbeıgeni aıtylǵan.

Alaıda qalalyq densaýlyq saqtaý basqarmasy bul málimetterdiń shyndyqqa janaspaıtynyn atap ótti. Vedomstvo dereginshe, jyl basynan beri Shymkentte qyzylshanyń bir ǵana rastalǵan jaǵdaıy tirkelgen, epıdemıologııalyq kórsetkishter óte tómen deńgeıde.

— Shymkent qalasy boıynsha sanıtarııalyq-epıdemıologııalyq baqylaý departamentiniń ınfektsııalyq aýrýlar jónindegi derekterine sáıkes, qazirgi ýaqytta qyzylshanyń bir ǵana rastalǵan jaǵdaıy bar. Kórsetkish 100 myń turǵynǵa shaqqanda 0,08-di quraıdy, — dep habarlady basqarmadan.

Óz sózderin rastaý úshin vedomstvo juqpaly aýrýlar aýrýhanasyndaǵy bos palatalar men dálizder kórsetilgen foto jáne beınematerıaldardy usyndy.

Eske salaıyq, qazan aıynda Shymkentte maýsymdyq jedel respıratorlyq aýrýlardyń kóbeıýine baılanysty juqpaly aýrýlar aýrýhanasynda keıbir naýqas ýaqytsha dálizderge ornalastyrylǵan bolatyn.

Keıin Densaýlyq saqtaý mınıstrligi bul jaǵdaı epıdemıologııalyq kezeńge tán maýsymdyq júktememen baılanysty ekenin jáne palatalardyń jetispeýshiligi ýaqytsha sıpatta bolǵanyn túsindirdi.

Sol kezeńde qalada áleýmettik jelilerde «gonkong tumaýy» dep atalǵan derttiń taralýy týraly da áńgime órbigen edi. Alaıda epıdemıologter Shymkentte atalǵan tumaý shtammynyń birde-bir rastalǵan jaǵdaıy anyqtalmaǵanyn málimdegen.