Shymkentte qystyń sońǵy aıynda jemis aǵashtary gúldedi
ShYMKENT. KAZINFORM — Shymkent taǵy da kóktemdi kúntizbeden buryn qarsy aldy. Qystyń sońǵy kúnderi qala aq-qyzǵylt gúlge oranyp, órik pen badam aǵashtary búr jardy.
Kóshelerdi názik gúl kómkerip, turǵyndar telefon men fotoapparattaryn alyp, serýenge jıi shyǵa bastady.
Jemis aǵashtary da bir mezgilde derlik gúldedi. Saıabaqtarda, skverlerde jáne aýlalarda aǵash butaqtary alǵashqy gúl shoǵyryna tolyp, shahardyń shyraıyn asha tústi.
Shýaqty kóktemniń osy bir keremet sátterin Kazinform fototilshisi Maqsat Shaǵyrbaı sýretke túsirip úlgerdi. Bul kórinister aqpannan góri naýryz aıynyń sońyn kóbirek eske salady.
Aǵashtardyń erte gúldeýine bıylǵy qystyń erekshe jyly ótýi sebep boldy. Qatty aıaz tirkelmeı, aýa temperatýrasy kóbine oń kórsetkishterde saqtaldy. Sonyń nátıjesinde turǵyndar jeńil kıimmen júr.
Alaıda mundaı jyly aýa raıy baǵbandardy alańdatyp otyr. Eger naýryz aıynyń basynda qysqa merzimdi úsik qaıtalansa, gúlder zaqymdanyp, ónimge keri áser etýi múmkin.
Sınoptıkter aýa raıynyń qubylmaly bolatynyn eskertti. 28 aqpanda Shymkentte jańbyr men qar túrindegi jaýyn-shashyn túsip, jel kúsheıip, tuman túsýi yqtımal. Kúndiz aýa temperatýrasy +7…+9 gradýsqa deıin jylynsa, túnde -2 gradýsqa deıin tómendeýi múmkin.
— 1 naýryzda jaýyn-shashyn bolmaıdy, kúndiz aýa temperatýrasy +9…+11 gradýs, al túnde -2…-4 gradýsqa deıin salqyndaıdy. 2 naýryzda qaıtadan jaýyn-shashyn bolýy múmkin, túnde jańbyr aralas qar jaýyp, aýa temperatýrasy shamamen 0…+2 gradýsty kórsetedi, kúndiz jańbyr jaýyp, +9…+11 gradýsqa deıin jylynady, — dedi «Qazgıdromet» RMK baspasóz hatshysy Arýjan Muratova.
Baǵbandar aýa raıy boljamyn jiti baqylap otyrǵan kezde, qala kóktemge daıyndyq jumystaryn da qarqyndy júrgizip jatyr.
Qazir gúlzarlarda alǵashqy qyzǵaldaqtar qylań bere bastady. Ázirge olardyń sany az bolǵanymen, jaqyn arada gúl kompozıtsııalary aýqymdy bolmaq. Bıyl memlekettik-jekeshelik áriptestik aıasynda Shymkentte 13 ýchaskege jáne qalalyq saıabaqtarǵa 1,6 mıllıon qyzǵaldaq otyrǵyzyldy.
Sonymen qatar jylyjaılarda 2 mıllıonǵa jýyq birjyldyq gúl ósirilip jatyr. Mamandar tamshylatyp sýarý ádisin qoldanyp, agrotehnıkalyq talaptardy saqtaı otyryp, kóshet qoryn aldyn ala daıyndaǵan.
— Bul qajetti gúl qoryn daıyndap, bıýdjet qarajatyn tıimdi paıdalanýǵa múmkindik beredi, — dep habarlady qalalyq jaıly ortany damytý basqarmasy ókilderi.
Asar shaǵynaýdanynda 2 gektar aýmaqta kópjyldyq ósimdikter ósiriletin jylyjaı kesheni jumys isteıdi. Munda tuqym sebý jáne kóshet daıyndaý jumystary aıaqtalǵan. Bıyl alǵash ret qala ortalyǵyndaǵy kósheler osy keshende ósirilgen gúldermen bezendirilmek.
Jalpy, qala kóshelerine ehınatseıa, kók salvııa, lavanda jáne ashyq tústi gaılardııa syndy 4 mıllıonǵa jýyq ósimdik otyrǵyzý josparlanyp otyr.
Shymkentte kóktemniń lebi sezile bastaǵanymen, Qazaqstannyń basym bóliginde qys yzǵary áli qaıtqan joq. Birqatar óńirlerde aıaz bolyp, daýyldy eskertý jarııalanǵan.
Alaıda sınoptıkterdiń boljamynsha, 2 naýryzdan bastap el aýmaǵynda aýa raıy jylyna bastaıdy.
Budan buryn Túrkistandaǵy botanıkalyq baqta qyzǵaldaqtar búr jarǵanyn jazǵan edik.