Shymkentte qyrǵyzstandyq eki qyzdyń kúshpen jumys istegeni týraly aqparat tekserilip jatyr

ShYMKENT. KAZINFORM – Áleýmettik jelilerde Qyrǵyzstannan kelgen eki qyzdyń Shymkentte kúshtep ustalǵany týraly aqparat tarady.

Qyrǵyzstandyq 24.kg basylymynyń málimetinshe, 2024 jyldyń naýryzynda K.K. esimdi áıel 16 jáne 18 jastaǵy eki qyzdy jumysqa ornalastyramyn dep ýáde berip, Shymkentke alyp ketken. Alaıda keıin qyzdar analaryna habarlasyp, ózderiniń uryp-soǵylǵanyn jáne bazar men qoımada aýyr jumysqa jegilgenin aıtqan. Olardyń sózinshe, ózderine qul sııaqty qarym-qatynas jasalǵan.

Anasynyń sózine qaraǵanda, jumys berýshiler qyzdardyń qujattaryn tartyp alyp, olardyń Qyrǵyzstanǵa qaıtýyna múmkindik bermegen. Keıin kóshi-qon zańnamasyn buzýǵa baılanysty sotta isteri qaralyp, qyzdar elge qaıtarylyp, analaryna tabystalǵan.

Bul jaǵdaıǵa qatysty Shymkent qalalyq polıtsııa departamenti túsinikteme berdi.

– Tekserý júrgizilip jatyr. Atalǵan derek boıynsha polıtsııaǵa resmı ótinish túspegen. Qazir kelip túsken aqparattyń mán-jaıy anyqtalýda, onyń ishinde Qyrǵyz Respýblıkasynyń quzyrly organdarymen birlesip tekserý júrgizilýde. Tekserý qorytyndysy boıynsha qosymsha aqparat beriledi, – delingen vedomstvo habarlamasynda.

Buǵan deıin Jambyl oblysynda balalar arasyndaǵy býllıng faktileri jasyrylyp kelgeni habarlanǵan bolatyn.