Shymkentte kıberpolıtsııa ınternet-alaıaqtyqtyń jolyn kesti

ASTANA. KAZINFORM — Shymkentte kıberpolıtsııa ınternet-alaıaqtyqtyń jolyn kesip, zeınetkerdiń urlanǵan 9 mln teńgesin qaıtaryp berdi. Bul týraly Polisia.kz jazdy.

— Shymkentte polıtsııa iri ınternet-alaıaqtyq dereginiń aldyn alyp, qart turǵynǵa urlanǵan qarajatyn qaıtarýǵa kómektesti. Alaıaqtar zeınetkerge habarlasyp, ózderin bank qyzmetkerleri retinde tanystyrǵan. Psıhologııalyq qysym jasap, túrli aıla-tásilderdi qoldanyp, áıeldi qupııa derekterin aıtýǵa jáne belgili bir áreketter jasaýǵa kóndirgen, — dep jazdy quzyrly organnan.

Sonyń saldarynan onyń banktik shotynan qomaqty qarjy zańsyz aýdarylǵan. Jábirlenýshiniń aryzyna jedel áreket etken kıberpolıtsııa qyzmetkerleri qajetti is-sharalar keshenin júrgizdi. Qabyldanǵan sharalardyń nátıjesinde aqsha aýdarylǵan arna der kezinde anyqtalyp, qarajattyń ári qaraı qolma-qol aqshaǵa aınaldyrylýyna jol berilmedi.

Nátıjesinde tártip saqshylary jábirlenýshige 9 mln teńgeni qaıtaryp berdi. ️ Polıtseıler mundaı qylmystardyń, ásirese, egde jastaǵy azamattarǵa qatysty jıi kezdesetinin atap ótedi.

Osyǵan baılanysty turǵyndardy saq bolýǵa shaqyrady. Jeke derekterdi, SMS-kodtardy jáne bank kartasynyń málimetterin eshkimge jarııa etpeý qajet. Kúdikti qońyraý túsken jaǵdaıda dereý polıtsııaǵa habarlasyńyz. 

Aıta keteıik, Qazaqstanda ınternet-alaıaqtyqtan kelgen shyǵyn 4,8 mlrd teńgege jetti.