Shymkentte kıberqylmys jasaǵany úshin 37 adam jaýapqa tartyldy
ShYMKENT. KAZINFORM — Shymkentte kıberalaıaqtyqqa qatysty 3 myńnan astam SIM-karta men 18 uıaly telefon tárkilendi.
Shymkentte ınternet-alaıaqtyqtyń aldyn alý jáne jolyn kesýge baǵyttalǵan «Antıfrod» jedel-profılaktıkalyq is-sharasy jalǵasyp jatyr.
Polıtsııanyń málimetinshe, 1 aqpannan bastap atqyrylǵan jumystar nátıjesinde kıberqylmysqa qarsy kúreste naqty kórsetkishterge qol jetkizilgen.
— Internet-alaıaqtyq jasaǵany úshin izdeýde júrgen 3 qylmysker ustalyp, bir uıymdasqan qylmystyq toptyń qyzmeti joıyldy. Sonymen qatar 2 hakerdiń zańsyz áreketi toqtatyldy. Budan bólek, SIM-kartalardy zańsyz iske qosýmen aınalysqan 5 adam qolǵa tústi. Olardan 3 myńnan astam SIM-karta men 18 uıaly telefon tárkilendi, — dedi Shymkent qalasy polıtsııa departamenti bastyǵynyń birinshi orynbasary Arman Beısenbaev.
Onyń aıtýynsha, kıberqylmys jasaǵany úshin 37 tulǵa jaýapkershilikke tartylyp, taǵy 27 azamat profılaktıkalyq esepke alynǵan. «Antıfrod» júıesi arqyly 15,5 mıllıon teńgeden astam qarajat buǵattalyp, 18 myńnan astam alaıaqtyq qońyraýdyń joly kesildi.
Sondaı-aq qylmystyq maqsatta paıdalanylǵan 337 ınternet-resýrs buǵattaldy.
Osyǵan baılanysty polıtsııa turǵyndardy qyraǵylyq tanytýǵa shaqyrady.
Budan buryn habarlaǵanymyzdaı, Shymkentte kıberpolıtsııa ınternet-alaıaqtyqtyń jolyn kesip, zeınetkerdiń urlanǵan 9 mln teńgesin qaıtaryp berdi.
