Shymkentte kene shaqqan 475 adam medıtsınalyq kómekke júgindi
ShYMKENT. KAZINFORM – Veterınarlar qaýipti aýrýlardyń aldyn alý úshin qaladaǵy qorajaılardy, gúlzarlar men saıabaqtardy zalalsyzdandyryp jatyr.
Shymkent qalasy aýyl sharýashylyǵy jáne veterınarııa basqarmasynyń málimetinshe, qalada jyl saıyn kóktem jáne kúz mezgilderinde kenege qarsy zalalsyzdandyrý jumystary júrgiziledi.
Bıylǵy alǵashqy kezeń naýryz-mamyr aılarynda atqarylǵan. Kene qaýpi joǵary aýmaqtardy óńdeýge 18 mamannan turatyn 6 brıgada jumyldyrylyp, suıyq jáne qurǵaq dáriler qoldanylǵan.
Sondaı-aq mamandar qorajaılar, gúlzarlar men saıabaqtar aýmaǵynda zalalsyzdandyrý jumystaryn júrgizip, 4,6 mln sharshy metr jerge dárilik suıyqtyq sepken.
– Bıyl qańtar-mamyr aılary aralyǵynda qalada Kongo-Qyrym gemorragııalyq qyzbasy jaǵdaıy tirkelgen joq. Degenmen osy kezeńde kene shaǵý deregi boıynsha 475 adam medıtsınalyq kómekke júgindi, - delingen vedomstvo habarlamasynda.
Resmı málimetke súıensek, kene shaqqan azamattardyń deni basqa óńirlerde mal sharýashylyǵymen aınalysý nemese demalys kezinde zardap shekken.
Budan buryn SQO-da 16 jastaǵy jasóspirim kene entsefalıti vırýsyn juqtyryp, em alyp jatqanyn jazǵan edik.
