Shymkentte qaıtarylǵan qarajat esebinen jataqhana paıdalanýǵa berildi
ASTANA. KAZINFORM – Shymkent qalasynda qaıtarylǵan qarajat esebinen erekshe bilim berý qajettilikteri bar balalar oqıtyn mektep-ınternat tárbıelenýshilerine arnalǵan zamanaýı jataqhana paıdalanýǵa berildi.
— Zańsyz shyǵarylǵan aktıvterdi qaıtarý jónindegi esepterdegi árbir sannyń artynda naqty taǵdyrlar men áleýmettik ádilettilik tur. Sonyń jarqyn dáleli — Shymkent qalasynda ashylǵan jańa nysan. Búgin erekshe bilim berý qajettilikteri bar (medıtsınalyq kórsetkishteri boıynsha) balalar oqıtyn mektep-ınternat tárbıelenýshilerine arnalǵan zamanaýı jataqhana paıdalanýǵa berildi, — dep jazdy Bas prokýror Berik Asylov.
Bas prokýrar tárbıelenýshilerge jaǵdaı jasalmaǵanyn aıtty.
— Buǵan deıin olardyń jaǵdaıy múldem qolaısyz bolǵan: 1975 jyly salynǵan ǵımarat, oryn tapshy bolyp, ınfraqurylym tozǵan. Normasy 125 oryn bolǵanymen, onda 290 bala turǵan. Jańa jataqhananyń jalpy aýdany 8288,70 m², 300 orynǵa arnalǵan jáne tolyqtaı zamanaýı standarttarǵa sáıkes keledi. Jalpy aýmaǵy 3,5 gektar jer ýchaskesinde fýtbol alańy (800 m²), vorkaýt aımaǵy, oıyn alańdary (450 m²) jáne demalys aımaqtary (200 m²) qarastyrylǵan.
Ǵımarattyń ishinde uldar men qyzdarǵa arnalǵan bólek turǵyn bloktar, jabdyqtalǵan medıtsınalyq bólim, keń oıyn bólmeleri, sondaı-aq tárbıelenýshiler úshin qolaıly, damytýshy ári qaýipsiz orta qalyptastyrýǵa baǵyttalǵan basqa da fýnktsıonaldyq bólmeler bar, — dedi ol.
Bul jobaǵa qaıtarylǵan qarajattar men qaıtarylǵan múlikti satýdan túsken qarajattar jınaqtalǵan Arnaýly memlekettik qordan 2,6 mlrd teńge bólindi.
— Memleket basshysynyń tapsyrmasy boıynsha bul jobaǵa qaıtarylǵan qarajattar men qaıtarylǵan múlikti satýdan túsken qarajattar jınaqtalǵan Arnaýly memlekettik qordan 2,6 mlrd teńge bólindi. Bul — bir rettik shara emes. Bas prokýratýramen qaıtarǵan qarajat esebinen eldi mekenderdiń ınfraqurylymyn júıeli túrde damytý búkil el boıynsha júrgizilip jatyr.
Shamamen 500 mlrd teńgege 440 áleýmettik jáne kommýnaldyq nysannyń qurylysy qarjylandyryldy, onyń 319-y paıdalanýǵa berildi, bul mektepter, aýrýhanalar jáne sýmen jabdyqtaý júıeleri. Qaıtarylǵan árbir teńge Qazaqstan azamattarynyń ıgiligine qyzmet etýi tıis, — dep jazdy Berik Asylov.
Aıta ketelik Astanada zańsyz aktıvter esebinen 12 bilim berý nysanyna qansha qarajat bólingeni týraly jazǵan edik.