Shymkentte Qaırat Nurtastyń kontsertinde 8 adam medıtsınalyq kómekke júgindi: qylmystyq is qozǵaldy
ShYMKENT. KAZINFORM – Shymkenttegi Qajymuqan Muńaıtpasov atyndaǵy stadıonda ótken kontsert kezinde 8 adam medıtsınalyq kómekke júgindi. Olardyń biri – 18 jastaǵy qyz aýrýhanaǵa jetkizildi. Osy derek boıynsha qylmystyq is qozǵaldy.
Oqıǵa 10 qazanda ánshi Qaırat Nurtastyń shyǵarmashylyq qyzmetiniń mereıtoıyna arnalǵan «Sahnada 20 jyl» kontsertine kórermender kirip jatqan kezde bolǵan. Áleýmettik jelilerde stadıonǵa kireberiste adamdardyń shamadan tys kóp jınalǵany týraly aqparat tarady.
Shymkent qalalyq Polıtsııa departamentiniń málimetinshe, kontsert kezinde qaýipsizdik talaptaryna saı kelmeıtin qyzmet kórsetý faktisi boıynsha qylmystyq is tirkeldi.
– Adamdardyń kóp jınalýyna baılanysty bir adam zardap shekti. Іs-sharany uıymdastyrýshylar polıtsııaǵa jetkizildi. Qazirgi ýaqytta sotqa deıingi tergep-tekserý júrgizilip, bolǵan jaǵdaıdyń barlyq mán-jaıy anyqtalyp jatyr, – delingen polıtsııa habarlamasynda.
Tergeý qorytyndysy boıynsha uıymdastyrýshylardyń áreketterine quqyqtyq baǵa berilip, tıisti protsestik sheshim qabyldanady.
Shymkent qalasynyń Densaýlyq saqtaý basqarmasynyń habarlaýynsha, kontsert kezinde medıtsınalyq kómekke júgingen 8 adamnyń jeteýi tekserýden keıin úıine jiberilgen.
– Al 18 jastaǵy qyz aýrýhanaǵa jetkizilip, oǵan qajetti medıtsınalyq kómek kórsetilip jatyr. Qazirgi ýaqytta onyń jaǵdaıy dárigerlerdiń baqylaýynda, – dep málimdedi vedomstvo.
Buǵan deıin Astanada Qaırat Nurtastyń kontsertine oraı arnaıy shattldar qatynaıtyny habarlanǵan bolatyn.
