Shymkentte Qaırat Nurtastyń kontsertin uıymdastyrýshy úıqamaqqa alyndy
ShYMKENT. KAZINFORM — Shymkentte Qaırat Nurtastyń kontserti kezinde segiz adamnyń zardap shegýine baılanysty kontsert uıymdastyrýshysy eki aıǵa úıqamaqqa alyndy. Tergeý sýdıasy ony qamaýda ustaýǵa sanktsııa berýden bas tartty. Prokýratýra bul sheshimge shaǵym túsirmek.
Shymkent qalasynyń prokýratýrasy málim etkendeı, tergeý organy kúdiktini qamaýda ustaý týraly ótinishhat bergen. Alaıda sot basqa bultartpaý sharasyn tańdaǵan.
— Qamaýda ustaý túrindegi bultartpaý sharasyn qoldaný týraly ótinishhatty sanktsııalaýdan tergeý soty bas tartty. Kúdiktige eki aı merzimge úıqamaq túrindegi bultartpaý sharasy qoldanyldy, — dep habarlady Shymkent qalasynyń prokýratýrasy.
Qadaǵalaý organy sot sheshimine shaǵym túsiretinin málimdedi.
Prokýratýranyń túsindirýinshe, prokýrordyń ótinishhaty túskennen keıin oblystyq nemese oǵan teńestirilgen sottyń sýdıasy úsh táýlikten keshiktirmeı qaýlynyń zańdylyǵy men negizdiligin tekseredi. Apellıatsııalyq tártippen qaraý nátıjesinde shyǵarylǵan sheshim jarııalanǵan sátten bastap zańdy kúshine enedi.
Buǵan deıin kontsert uıymdastyrýshy ustalyp, ýaqytsha ustaý ızolıatoryna qamalǵan bolatyn. Qazirgi ýaqytta sotqa deıingi tergep-tekserýdi Shymkent qalasy Polıtsııa departamentiniń Turan aýdandyq polıtsııa basqarmasy júrgizip jatyr.
Kúdiktiniń áreketi QR Qylmystyq kodeksiniń 306-babynyń 2-bóligi boıynsha saralanǵan. Bul bap qyzmet kórsetý kezinde qaýipsizdik talaptaryn buzǵany úshin jaýaptylyqty kózdeıdi. Atalǵan quqyq buzýshylyq úshin bes jylǵa deıin bas bostandyǵynan aıyrý jazasy qarastyrylǵan.
Eske salaıyq, 10 qazan kúni keshke Qajymuqan Muńaıtpasov atyndaǵy Ortalyq stadıonǵa kireberiste Qaırat Nurtastyń «Sahnada 20 jyl» atty kontserti aldynda jurtshylyq shamadan tys shoǵyrlanyp, saldarynan kórermender zardap shekti. Medıtsınalyq kómekke segiz adam júgindi. Dárigerler teksergennen keıin olardyń jeteýi úıine jiberildi. Al 18 jastaǵy qyz aýyr halde aýrýhanaǵa jatqyzyldy.
Polıtsııanyń aldyn ala málimetinshe, satylǵan bıletter sany stadıonnyń belgilengen syıymdylyǵynan edáýir asyp ketken. Sonyń saldarynan kórermenderdiń qaýipsizdigine qater tóngen.
