Shymkentte Qaırat Nurtastyń kontsertin uıymdastyrýshy ustaldy
ShYMKENT. KAZINFORM — Shymkentte Qaırat Nurtastyń kontserti kezinde qaýipsizdik talaptarynyń buzylýyna baılanysty qylmystyq is qozǵaldy. Kontsert uıymdastyrýshysy ustalyp, ýaqytsha ustaý ızolıatoryna qamaldy.
Aldyn ala málimetke qaraǵanda, satylǵan bıletter sany kontsert alańynyń ruqsat etilgen syıymdylyǵynan edáýir asyp ketken. Sonyń saldarynan kórermender shamadan tys jınalyp, adamdardyń qaýipsizdigine qater tóngen.
Shymkent polıtsııa departamentiniń málimetinshe, adamdardyń qysylyp qalýy saldarynan 18 jastaǵy qyz jaraqattanyp, aýrýhanaǵa jetkizildi.
Sondaı-aq polıtsııa áleýmettik jelilerde adam ólimi týraly taraǵan aqparatty joqqa shyǵardy. Resmı málimetke sáıkes, oqıǵa kezinde qaza tapqandar joq.
— Kontsertti uıymdastyrýshy, 1984 jyly týǵan L. esimdi azamat ustalyp, ýaqytsha ustaý ızolıatoryna qamaldy. Qazirgi ýaqytta tergeý júrgizilip jatyr. Tergeý barysy Shymkent qalasy polıtsııa departamenti basshylyǵynyń baqylaýynda, — delingen habarlamada.
Polıtsııa azamattardy tekserilmegen aqparatty taratpaýǵa úndep, kórineý jalǵan aqparat taratqany úshin zańda jaýapkershilik kózdelgenin eske saldy.
Buǵan deıin Shymkentte Qaırat Nurtastyń kontsertinde 8 adam medıtsınalyq kómekke júgingenin habarlaǵan edik.
