Shymkentte Qaırat Nurtastyń kontsertin uıymdastyrýshy bes jylǵa deıin sottalýy múmkin
ShYMKENT. KAZINFORM — Shymkentte Qaırat Nurtastyń kontserti kezinde zardap shekkenderge baılanysty tergeý jalǵasyp jatyr. Kontsert uıymdastyrýshysy qazir ýaqytsha ustaý ızolıatorynda otyr. Sot oǵan qatysty bultartpaý sharasyn ázirge qaraǵan joq. Aýrýhanaǵa túsken 18 jastaǵy qyzdyń jaǵdaıy aýyr.
Sotqa deıingi tergeýdi Shymkent qalasy polıtsııa departamentiniń Turan aýdandyq polıtsııa basqarmasy júrgizip jatyr. Kúdiktiniń áreketi QR Qylmystyq kodeksiniń 306-babynyń 2-bóligi boıynsha saralanǵan. Bul bap boıynsha qaýipsizdik talaptaryn buza otyryp qyzmet kórsetkeni úshin 5 myń AEK-ke deıin (2026 jyly 21,6 mln teńge) aıyppul salý nemese bes jylǵa deıin bas bostandyǵynan aıyrý jazasy kózdelgen.
Kazinform tilshisi istiń mán-jaıyn naqtylaý úshin polıtsııa departamentine, sotqa jáne prokýratýraǵa saýal joldady. Polıtsııa kúdiktiniń ýaqytsha ustaý ızolıatorynda otyrǵanyn rastady.
Sot tergeý kezeńindegi shekteýlerge baılanysty istiń mán-jaıyn jarııa etpedi.
— QR Qylmystyq-protsestik kodeksiniń 201-babyna sáıkes, is sotqa deıingi tergeý satysynda bolǵandyqtan, málimet bere almaımyz. Qosymsha aqparat alý úshin tergeý organdaryna nemese prokýratýraǵa júginýdi suraımyz, — dep habarlady sot.
Prokýratýra sot sheshimi shyqqanǵa deıin qoldanylatyn tártipti túsindirdi.
— Adam 48 saǵatqa deıin ustalýy múmkin. Osy merzim aıaqtalǵanǵa deıin tergeý sýdıasy kúdiktini kúzetpen ustaýǵa sanktsııa berý nemese odan bas tartyp, ózge bultartpaý sharasyn qoldaný máselesin qaraıdy. Qazirgi ýaqytta materıal sýdıanyń qaraýyna áli túsken joq, — dep túsindirdi prokýratýra.
Eske salaıyq, 10 qazan kúni keshke Shymkentte Qaırat Nurtastyń kontserti bastalar aldynda stadıonǵa kireberiste adamdar kóp jınalyp, saldarynan kórermender zardap shekti. Medıtsınalyq kómekke segiz adam júgindi. Dárigerler teksergennen keıin olardyń jeteýi úıine jiberildi. Al 18 jastaǵy qyz aýrýhanaǵa jatqyzyldy. 12 qazandaǵy málimet boıynsha onyń jaǵdaıy aýyr.
Polıtsııanyń aldyn ala málimetinshe, satylǵan bıletter sany alańnyń belgilengen syıymdylyǵynan edáýir asyp, kórermenderdiń qaýipsizdigine qater tóndirgen. Kontsert uıymdastyrýshysy ustalyp, ýaqytsha ustaý ızolıatoryna qamaldy.
Kontsertten keıin áleýmettik jelilerde qaza tapqandar men kóp adamnyń zardap shekkeni týraly aqparat tarady. Resmı organdar bul málimetterdi joqqa shyǵardy. Qaza tapqan úsh adam men jaraqattanǵan ondaǵan adam týraly jalǵan aqparat jarııalaǵan áıel jaýapkershilikke tartyldy.
Oqıǵadan keıin Freedom Afısha kompanııasy da óz ustanymyn bildirdi. Kompanııanyń málimetinshe, kontserttiń tikeleı uıymdastyrýshysy Show Service bolǵan. Bılet satý servısi bıletterdi málimdelgen kvota sheginde satyp, sondaı-aq kórermenderdiń bıletterin tekserip, bilezikterin taratýǵa jaýapty eriktilerdiń jumysyn qamtamasyz etken.
Freedom Afıshanyń málimdeýinshe, alańdy daıyndaý, kórermenderdiń stadıonǵa kirýin uıymdastyrý jáne kúzet qyzmetin tartý bılet servısiniń jaýapkershilik aıasyna kirmegen.
