Shymkentte qaı jerlerde sýǵa shomylýǵa bolady
ShYMKENT. KAZINFORM — Shymkentte shomylýǵa tyıym salynǵan 13 ýchaske anyqtaldy. Aldaǵy ýaqytta olardyń sany 31-ge deıin kóbeıtilmek.
Shymkent qalasy tótenshe jaǵdaılar departamentiniń málimetine súıensek, qala aýmaǵynda 3 orynda shomylýǵa resmı túrde ruqsat etilgen.
— Atap aıtqanda «Rahat-Badam» jáne «Toǵys» demalys aımaqtary, sondaı-aq Qoshqar ata ózeniniń jaǵalaý bóligi turǵyndardyń sýǵa túsýine qaýipsiz aımaq retinde bekitilgen, — delingen habarlamada.
Shomylý maýsymy resmı túrde áli ashylmaǵanymen, shaharda sáýir aıynan bastap sý aıdyndaryndaǵy demalýshylardyń qaýipsizdigin qamtamasyz etýge baǵyttalǵan profılaktıkalyq jumystar júrgizilip jatyr.
Departament deregine sáıkes, qazirgi tańda shomylýǵa tyıym salynǵan 13 ýchaske anyqtalǵan. Aldaǵy ýaqytta olardyń sanyn 31-ge deıin jetkizý kózdelip otyr. Qaýipti aımaqtarǵa eskertý belgileri men aqparattyq taqtaıshalar ornatylǵan.
— Sonymen qatar demalýshylar men turǵyndarǵa túsindirý jumystary júrgizilip jatyr. Shymkent qalasy boıynsha kóliktik baqylaý ınspektsııasymen birlesip qaıyqtar, katamarandar jáne ózge de shaǵyn júzý quraldarynyń tehnıkalyq jaǵdaıy tekserildi, — dep habarlady qalalyq TJD.
Aıta keteıik, ótken jylǵy shomylý maýsymynda Shymkentte eki jazataıym oqıǵa tirkelgen. Badam ózeniniń shlıýz mańynda eki adam sýǵa ketip, kóz jumǵan. Onyń bireýi — bala. Bıyl ázirge mundaı derek tirkelmegen.
Tótenshe jaǵdaılar departamenti turǵyndar men qala qonaqtaryn balalardy qaraýsyz qaldyrmaýǵa, belgilenbegen oryndarda shomylmaýǵa jáne qutqarý quraldaryn paıdalanýǵa shaqyrady.
Budan buryn habarlaǵanymyzdaı, bıyl Túrkistan oblysynda shomylý oryndary kóbeıedi.
