Shymkentte kásipkerlerge zańsyz eseptelgen 260 mln teńge qaıtaryldy
ShYMKENT. KAZINFORM – Shymkentte syrtqy jarnamaǵa baılanysty zańsyzdyqtar áshkerelenip, kináli laýazymdy tulǵalar jaýapqa tartyldy.
Qala prokýratýrasy júrgizgen taldaý barysynda syrtqy jarnama boıynsha jergilikti atqarýshy organdar tarapynan birqatar zań buzýshylyqtarǵa jol berilgeni anyqtaldy.
Vedomstvo málimetine súıensek, habarlama bermegen 4286 kásipkerge memlekettik baqylaý nátıjesinde aldyn ala usynym berilmeı, buzýshylyqtardy óz erkimen joıý múmkindigi shektelgen. Sonymen qatar jarnama bolyp sanalmaıtyn 127 nysan (mańdaısha) syrtqy jarnama retinde esepke alynyp, tólemaqylar belgilengen. Al syrtqy jarnama nysanyn ornatpaǵan 115 tulǵa negizsiz tólem tóleýshi retinde tanylǵan.
– Osynyń saldarynan kásipkerlerge jalpy kólemi 260 mln teńge tólemaqy negizsiz eseptelgen. Prokýrorlyq qadaǵalaý aktileri nátıjesinde bıýdjetke zańsyz óndirilgen tólemaqy qaıtarylyp, 2571 kásipker men jeke tulǵanyń quqyǵy qorǵaldy. Sonymen qatar kináli laýazymdy tulǵalar tártiptik jáne ákimshilik jaýapkershilikke tartyldy, – dep habarlady Shymkent qalasynyń prokýratýrasy.
Budan buryn Shymkentte jarnama tólemin esepteý kásipkerler arasynda túsinbeýshilik týdyrǵanyn jazǵan edik.
