Shymkentte kásipkerler sany 141 myńǵa jetti
ASTANA. KAZINFORM – Shymkent qalasynyń ákimi Ǵabıt Syzdyqbekov Ortalyq kommýnıkatsııalar qyzmetinde ótken baspasóz konferentsııasynda kásipkerlikti qoldaý jáne qalanyń ekonomıkalyq damý kórsetkishteri jóninde baıandady.
Ákimniń aıtýynsha, qalada jańa bastamalardy damytý maqsatynda kásipkerlerge qoljetimdi ınfraqurylymmen qamtylǵan, aýmaǵy 45 myń sharshy metrdi quraıtyn úsh shaǵyn óndiristik alańnyń qurylysy aıaqtalýǵa jaqyn. Bul aýmaqtarda 50-den astam shaǵyn kásiporyn ashylyp, 300-den asa adam turaqty jumyspen qamtylady.
– Ótken jyldan bastap kásipkerlerdi ashyq jáne adal salyq tóleýge yntalandyrý maqsatynda bólshek salyq mólsherin 4 paıyzdan 2 paıyzǵa tómendetken bolatynbyz. Nátıjesinde osy salyq túrinen bıýdjetke túsetin túsimder 9 mlrd teńgeden 31 mlrd teńgege, ıaǵnı úsh esege artty. Bıyl jańa Salyq kodeksine baılanysty bul sheshimdi qaıta qabyldap, kelesi jyldan bastap jeńildik paıdalanatyn kásipkerler sany 8 myńnan 102 myńǵa deıin kóbeıedi, - dedi qala ákimi Ǵabıt Syzdyqbekov.
Ákimniń málimetinshe, sońǵy úsh jylda memlekettik qoldaý sharalarynyń nátıjesinde Shymkenttegi belsendi shaǵyn jáne orta bıznes sýbektileriniń sany 128 myńnan 141 myńǵa jetti. Al jumyspen qamtylǵandar sany 250 myń adamnan asty.
Qala ekonomıkasynda shaǵyn jáne orta kásipkerlikpen óndirilgen ónim úlesi 41 paıyzdan 58 paıyzǵa artty. Bıyl kásipkerlikti qoldaýǵa 20 mlrd teńge bólinip, 1 971 joba qarjylandyrý men qoldaý aldy.
Ǵabıt Syzdyqbekovtiń aıtýynsha, qala aýmaǵyndaǵy 19 bazardyń 15-i tolyq modernızatsııadan ótken. Qalǵan tórt bazarda jańǵyrtý jumystary bıyl aıaqtalyp, barlyq bazarlar jańa standarttarǵa sáıkestendiriledi. Sonymen qatar ol sózinde óndiris oryndaryn ashý men ınvestıtsııa tartýdyń qala ekonomıkasyna tikeleı áser etetinin atap ótti.
– Qazirgi tańda ashylǵan óndiris oryndary men jumys istep turǵan kásiporyndarǵa jyl basynan beri 34 myńnan astam adam turaqty jumysqa ornalastyryldy, - dedi qala ákimi.
Sonymen qatar keıingi 3 jylda Shymkent ekonomıkasyna qansha ınvestıtsııa tartylǵanyn jazǵanbyz.