Shymkentte kásipkerdi qorqytyp, 10 mln teńge talap etken eki kúdikti ustaldy
ShYMKENT. KAZINFORM — Shymkentte kásipkerge qoqan-loqy jasap, aqsha talap etken eki er adam qolǵa tústi.
Aldyn ala tergeý derekterine sáıkes, oqıǵa qaladaǵy bazarlardyń birinde bolǵan. Et ónimderin tasymaldaý kezinde taýar búlinip, saldarynan taraptar arasynda shyǵyndy óteýge qatysty daý týyndaǵan.
Qalalyq polıtsııa departamentiniń málimetinshe, kúdiktiler kásipkerge tıesili júk kóliginiń kiltin ıemdenip, odan 10 mln teńge talap etken. Aqsha berilmegen jaǵdaıda júk kóligin ıesimen birge órtep jiberetinderin aıtyp, qorqytqan.
— Polıtsııa departamentiniń qyzmetkerleri UQKD-men birlesip júrgizgen jedel is-shara barysynda kúdiktilerdi talap etilgen somanyń 5 mln teńgesin alyp jatqan jerinen ustady. Kúdiktiler ýaqytsha ustaý ızolıatoryna qamaldy. Óz betinshe bılik etý deregi boıynsha qylmystyq is qozǵaldy, — delingen polıtsııa habarlamasynda.
Qazirgi ýaqytta oqıǵanyń mán-jaıyn anyqtaýǵa baǵyttalǵan tergeý amaldary júrgizilip jatyr.
Buǵan deıin Shymkentte 10 mln teńge bopsalaǵan eki azamat 5 jylǵa sottalǵanyn habarlaǵan edik.
