Shymkentte qaryzyn qaıtara almaǵan turǵyndy bir top jigit sabap tastady

ShYMKENT. KAZINFORM — Qazir oqys oqıǵaǵa qatysty qylmystyq is qozǵaldy.

Áleýmettik jelide taraǵan aqparatqa súıensek, bir top jigit qaryzyn ýaqytyly tóleı almaǵan turǵyndy qan josa etip uryp-soǵyp, pyshaqtap tastaǵan. Oqıǵa lıft ishindegi vıdeo kameraǵa túsip qalǵan. Onda 4-5 jigittiń jábirlenýshini ońdyrmaı tepkilep jatqanyn kórýge bolady. On kún boıy aýrýhanada jatyp, em qabyldaǵan jábirlenýshi úıine endi ǵana shyqty.

Shymkent qalasy polıtsııa departamentiniń baspasóz qyzmeti atalǵan fakt boıynsha qylmystyq is qozǵalǵandyǵyn jetkizdi.

— Oqıǵaǵa qatysy bar tulǵalar anyqtalyp, polıtsııa bólimine jetkizildi. Oqıǵanyń mán-jaıyn anyqtaý maqsatynda keshendi tergeý sharalary júrgizilýde, — delingen vedomstvo aqparatynda.

Aıta keteıik, budan buryn Shymkentte joǵalǵan úsh adamnyń biriniń denesi tabylǵanyn jazǵan bolatynbyz.