Shymkentte qaraqurt shaqqan 5 adam dárigerge júgindi

ShYMKENT. KAZINFORM – Bıyl qaraqurttar ádettegiden erte belsendi bola bastady.

Shymkentte 8 turǵyn qaraqurt shaǵýyna baılanysty qalalyq gıperbarııalyq oksıgenatsııa ortalyǵyna júgingen. Úsh jaǵdaıda zardap shekkender shaǵýdyń naqty qaıdan bolǵanyn anyqtaı almaǵan, alaıda bes jaǵdaıda dárigerler sebepshi karakýrt ekenin anyqtady. Olardyń ekeýi aýrýhanaǵa jatqyzylsa, qalǵandary ambýlatorııalyq em qabyldaǵan. Der kezinde kórsetilgen kómektiń nátıjesinde óńirde aýyr asqynýlar men ólim jaǵdaılary tirkelgen joq.

Ortalyqtyń bas dárigeri Madına Ermahanbetovanyń aıtýynsha, qaraqurt shaǵýy bastapqyda erekshe belgi bermeýi múmkin.

- Alǵashqyda jeńil shanshý men teride qyzarý baıqalady. Biraq 10–15 mınýt ótken soń ýlaný belgileri paıda bolyp, búkil deneni jaılaǵan aýyrsyný, qurysý, bas pen ishtiń aýyrýy, qatty terleý, entigý jáne júrek jumysynyń buzylýy sııaqty sımptomdar baıqalady. Eskeretin jaǵdaı, ýly jándikter ózdiginen shabýyl jasamaıdyn. Biraq mekendeý ortasyna qaýip tóngen jaǵdaıda qorǵaný maqsatynda shaǵýy múmkin, – dedi Madına Ermahanbetova.

Ótken jyly qaraqurttardyń belsendiligi shilde aıyna sáıkes kelgen bolatyn. Sonda ortalyqqa 20 adam qaraqurt shaǵýyna baılanysty júgingen. Olardyń ishinde 14 er adam, 4 áıel jáne 2 bala bar.

Qaraqurttar kóbine tar ári qurǵaq jerlerde bolady. Eski saraılar, qýraǵan shóp, qurylys qaldyqtary, tipti kıim men aıaqkıim ishin mekendeıdi. Adamdar órmekshini baıqamaı, abaısyzda baılanysqa túskende shaǵý jaǵdaıy oryn alady. Sondyqtan dárigerler kún jylynysymen saqtyq sharalaryn qoldanýdy usynady. Atap aıtar bolsaq, aıaqkıim men syrt kıimdi kımes buryn muqııat tekserý kerek, úı aýlasyn taza ustaý, shóp pen qoqysty ýaqtyly tazartý qajet.

Al ýly jándik shaǵyp alsa dereý medıtsınalyq kómekke júgingen durys. Sebebi, qaraqurt ý-y adam ómirine qaýipti. 

Aıta keteıik, budan buryn Shymkentte jylan kóbeıip ketkenin jazǵan bolatynbyz.