Shymkentte «Kapıtal» qarjy pıramıdasy anyqtaldy: zalal 700 mln teńge
ASTANA. KAZINFORM — QMA Shymkent qalasy boıynsha departamenti «Kapıtal» ataýymen ınvestıtsııalyq platforma retinde jasyryn áreket etken qarjy pıramıdasyn uıymdastyrý faktisi boıynsha tergep-tekserý júrgizip jatyr.
Tergeý amaldaryna saı, kúdikti áleýmettik jeliler arqyly azamattardan 20 000-nan 500 000 teńgege deıin qarajat tartyp, 3–5 kún ishinde salym somasynyń 30–50%-ǵa deıin joǵary tabys ýáde etken.
— Jańa qatysýshylardy tartý úshin psıhologııalyq áser etý tásilderi qoldanylǵan. Atap aıtqanda, «jyldam tabys» týraly ýádeler men ýaqytpen shektelgen usynystar arqyly azamattar qarjylyq táýekelderdi tolyq baǵalamaı, sheshim qabyldaýǵa ıtermelengen. Alaıda ýáde etilgen tabysqa kepildikter tek aýyzsha berilip, naqty kásipkerlik qyzmetpen nemese qandaı da bir sharttyq mindettemelermen qamtamasyz etilmegen, – dep habarlady QMA.
Shyn máninde, salymshylarǵa tólemder jańa qatysýshylardan túsken qarajat esebinen júrgizilgen. Nátıjesinde qarjy pıramıdasyna 900-den astam salymshy tartylyp, jalpy salynǵan qarajat kólemi 700 mln teńgeden asqan.
Tergep-tekserý jalǵasyp jatyr. Quzyrly organ Qazaqstan Respýblıkasynyń Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıtynyn eskertti.
Qarjylyq monıtorıng agenttigi azamattardy saq bolýǵa jáne qysqa merzimde joǵary tabys ýáde etetin kúmándi jobalarǵa aqsha salýdan bas tartýǵa shaqyrady. Investıtsııa jasamas buryn uıymnyń qyzmetiniń zańdylyǵyn jáne tıisti ruqsat qujattarynyń bar-joǵyn muqııat tekserý qajet.
Aıta keteıik, Almatyda qarjy pıramıdasyna aldanǵandar 110 mln teńgeden aıyryldy.
