Shymkentte kámeletke tolmaǵan qyzǵa shabýyl jasamaq bolǵan jasóspirim ustaldy
ShYMKENT. KAZINFORM – Shymkent qalasynda jasóspirimniń kámeletke tolmaǵan qyz balaǵa shabýyl jasaýǵa árekettený faktisi boıynsha qylmystyq is qozǵaldy.
Áleýmettik jelide taraǵan polıtsııa kólikteri men kóshe beınebaqylaý kameralarynan alynǵan kadrlar túrli qaýesetke sebep boldy. Polıtsııa atalǵan oqıǵa boıynsha tergeý bastalǵanyn jáne kúdiktiniń ustalǵanyn rastady.
Áleýmettik jelide 15-17 jas shamasyndaǵy jasóspirimniń kámeletke tolmaǵan qyz balaǵa qatysty jynystyq sıpattaǵy zańsyz áreket jasaýǵa talpynǵany týraly aqparat tarady.
Jarııalanymdarda onyń ustalǵany aıtylyp, dálel retinde polıtseılik avtokólikter men quqyq qorǵaý organdary qyzmetkerleri beınelengen vıdeolar usynyldy. Avtorlardyń málimetinshe, kadrlar jasóspirimdi izdeý barysynda túsirilgen.
Keıinirek jelide kóshe beınebaqylaý kameralarynan alynǵan taǵy bir beınejazba paıda boldy. Onda jasóspirimniń qolyna qyz balany kóterip alyp júgirip bara jatqan sáti kórinedi. Dál osy jazbalar áleýmettik jelilerde túrli boljamdar men qyzý talqylaýlardyń taralýyna negiz boldy.
Shymkent qalalyq polıtsııa departamenti oqıǵaǵa qatysty túsinikteme berip, ıntsıdenttiń bolǵanyn jáne tergeý bastalǵanyn rastady.
Polıtsııa málimetinshe, 1 aqpanda ishki ister organdaryna jasóspirimniń kámeletke tolmaǵan qyz balany ustap alyp, oǵan qatysty zańsyz áreket jasaýǵa talpynǵany týraly aryz túsken. Atalǵan derek boıynsha qylmystyq is qozǵaldy.
– Polıtsııa qyzmetkerleri oqıǵa ornyna jedel jetti. Kúdikti izin sýytpaı ustalyp, ýaqytsha ustaý ızolıatoryna qamaldy. Jasóspirimniń ata-anasy polıtsııaǵa jetkizildi. Qyz balamen psıhologtyń qatysýymen áńgime júrgizildi, – dep habarlady vedomstvodan.
Polıtsııa ókilderi balanyń ómiri men densaýlyǵyna qaýip tónip turmaǵanyn atap ótti.
– Qajetti tergeý áreketteri júrgizilip jatyr. Nátıjesine qaraı tıisti protsessýaldyq sheshim qabyldanady, – dep qosty quqyq qorǵaý organdary.
Buǵan deıin Shymkentte áıeldiń pyshaq jaraqatynan qaza tapqany habarlanǵan bolatyn. Kúdikti ustalǵan sátte polıtsııa qyzmetkerlerine qarsylyq kórsetip, sonyń saldarynan tártip saqshylary qyzmettik qarý qoldanýǵa májbúr bolǵan.