Shymkentte qala tazalyǵyna jaýapty jumysshylar marapattaldy
ShYMKENT. KAZINFORM — Búgin Shymkent qalasy ákimdiginde jumysshy mamandyq ıelerin marapattaýǵa arnalǵan saltanatty jıyn ótti.
Іs-sharaǵa qala ákimi Ǵabıt Syzdyqbekov qatysyp, shahardyń damýyna eleýli úles qosyp júrgen túrli sala ókilderine alǵys bildirdi.
Kúndelikti kózge kóp kórine bermegenimen, qalanyń tynys-tirshiligine tikeleı yqpal etetin jumysshy mamandyq ıeleriniń eńbegi orasan. Qala tazalyǵy, kórkeıtý-kógaldandyrý, kommýnaldyq qyzmet, jol, jaryq jáne abattandyrý salalarynda tabandy eńbek etip júrgen azamattar qala ákiminiń arnaıy qabyldaýynda boldy.
Kezdesý barysynda qala basshysy árbir eńbek adamymen jeke suhbattasyp, olardyń usynys-pikirlerin tyńdady. Erkin formatta ótken jıynda jumysshylardyń kúndelikti qyzmeti, saladaǵy ózekti máseleler men aldaǵy josparlar talqylandy.
— Qalanyń kórkeıýi men turǵyndardyń jaıly ómir súrýi – sizderdiń mańdaı terlerińizdiń jemisi. Sizder atqaryp júrgen eńbek qashanda qurmetke laıyq. Jumysshy mamandyqtary tek bir jyl aıasynda ǵana emes, árdaıym qoǵamnyń basty tiregi bolyp qala beredi, – dedi qala ákimi.
Sondaı-aq Ǵabıt Syzdyqbekov eńbek adamdaryn aldaǵy Jańa jyl merekesimen quttyqtap, zor densaýlyq, otbasylaryna amandyq, eńbekterine tolaǵaı tabys tiledi.
Jıyn sońynda marapat ıeleri kórsetilgen qurmetke rızashylyqtaryn bildirip, el ıgiligi jolyndaǵy eńbekterin odan ári jalǵastyra beretinderin atap ótti.
Eńbek adamyn ulyqtaý – qoǵamnyń turaqty damýy men órkendeýiniń kepili. Osyndaı taǵylymdy kezdesýler jumysshy mamandyqtarynyń bedelin arttyryp, olardyń qoǵamdaǵy mańyzyn aıqyndaı túsetini sózsiz.
Aıta keteıik, Qaraǵandy men Shymkentte otbasylardyń ál-aýqaty arnaıy júıe arqyly baǵalanady.