Shymkentte ıtti kólikpen súıregen júrgizýshi jaýapqa tartyldy

ShYMKENT. KAZINFORM – Shymkent turǵyny ıtin kóligine shynjyrmen baılap alyp, kóshe aralaǵan.

Úı janýaryna asa qatygezdik tanytqan júrgizýshiniń áreketi áleýmettik jelide tarap ketti. Ony jolda ózge turǵyndar toqtatyp, ıtti azaptaýǵa bolmaıtyndyǵyn túsindiredi. Tipti, polıtsııaǵa habar berip, shaǵymdanatyndyǵyn jetkizgenin kórýge bolady. Al, júrgizýshi adamdardyń qysymynan soń, ıtti júk salǵyshqa salyp alǵan.

Atalǵan jaǵdaı boıynsha Shymkent qalasy polıtsııa departamentiniń baspasóz qyzmeti quqyq buzýshynyń anyqtalyp, polıtsııaǵa jetkizilgendigin málimdedi.

- Júrgizýshi janýarǵa qatygezdikpen qaraǵany úshin jaýapqa tartyldy, delingen vedomstva aparatynda.

Aıta keteıik, budan buryn Shymkentte kortej jasaǵan mopedshiler jaýapqa tartylǵan bolatyn.