Shymkentte ıpotekasyn tóleı almaǵan kópbalaly otbasy baspanasyz qala jazdady

ASTANA. KAZINFORM — Shymkent turǵyny ıpotekalyq kompanııamen quny 13 mıllıon teńgeden asatyn úsh bólmeli páterdi satyp alý quqyǵymen jaldaý shartyn jasasqan. Biraq  keıinnen 2 mıllıon teńgeden astam somada qaryz bolyp qalǵan, dep habarlaıdy Shymkent qalalyq soty.

Kompanııa qaryzdy óndirip alý, jaldaý shartyn buzý jáne jalǵa alýshyny úıden shyǵarý týraly talap qoıýmen sotqa júgingen. Kámeletke tolmaǵan tórt balanyń ákesi — jaýapker qaryz somasyna daýlaspaǵan. Materıaldyq jaǵdaıynyń qıyndyǵyn alǵa tartyp, ony páterden shyǵarmaýdy, qaryzdy óteýge jáne daýdy beıbit jolmen sheshýge múmkindik berýdi surady. Bul rette Azamattyq kodekske sáıkes tólem kestesin buzý — jaldaý shartyn buzýǵa negiz sanalady.

Shymkent qalasynyń azamattyq ister jónindegi aýdanaralyq sotynda taraptar bitimgershilik kelisimge kele almaǵan. Sondyqtan sot isti máni boıynsha qarap, talap qoıýdy qanaǵattandyrdy: qaryzdy óndirip alyp, jaldaý shartyn buzyp, tórt balasy bar jaýapkerdi úıden shyǵarý týraly qaýly shyǵardy. Alaıda apellıatsııalyq satyda taraptar tatýlasyp úlgerdi.

— Shymkent qalalyq sotymen daýdy medıatsııa tártibimen retteý týraly kelisim bekitilip, is boıynsha is júrgizý toqtatyldy. Jasalǵan kelisimderge sáıkes, jaýapker osy úıde otbasymen turýyn jalǵastyra otyryp, salyqtyq qaryzdy óteýge mindettendi. Satyp alý quqyǵymen jaldaý shartynyń talaptary taraptar óz mindettemelerin tolyq oryndaǵanǵa deıin áreket etedi. Uıǵarym zańdy kúshine endi, — delingen sot taratqan aqparatta.

Budan buryn terrorızmdi nasıhattaǵan shymkenttik 7,5 jylǵa sottalǵany málim boldy.