Shymkentte ınvestorlarǵa kedergi keltirgen sheneýnikter aıyppul arqalady
ASTANA. KAZINFORM — Shymkentte ınvestorlardyń aýyl sharýashylyǵy ónimderin shetelge eksporttaýyna kedergi keltirgen laýazymdy tulǵalar jaýapqa tartyldy.
Qarataý aýdany prokýratýrasynyń ınvestorlardyń quqyqtaryn qorǵaý salasynda júrgizgen taldaýy barysynda Shymkent boıynsha Agroónerkásiptik keshendegi memlekettik ınspektsııa komıteti aýmaqtyq ınspektsııasynyń laýazymdy tulǵalary tarapynan zań buzýshylyqtar anyqtalǵan.
Atap aıtqanda, aýyl sharýashylyǵy ónimderin shetelge eksporttaý úshin qajetti fıtosanıtarııalyq sertıfıkattardy alý kezinde ınvestorlarǵa qujattardy berýge negizsiz kedergiler jasalǵan.
Osy faktiler boıynsha mekeme basshysy men laýazymdy tulǵalaryna qatysty QR ÁQBtK-niń 173-baby 4-bóligi boıynsha tórt ákimshilik hattama toltyryldy.
— Nátıjesinde kináli tulǵalarǵa jalpy somasy 865 myń teńge aıyppul salyndy. Aıyppul tolyq kólemde tólendi, — delingen habarlamada.
Eske salaıyq, munyń aldynda Almaty oblysynda ınvestorlardyń jumysyna kedergi keltirgen 18 sheneýnik jazalanǵanyn jazǵanbyz.
