Shymkentte ınvestordyń shottaryn 4 aı boıy buǵattaǵan salyq organyna aıyppul salyndy
ASTANA. KAZINFORM — Shymkentte ınvestordyń salyqtyq mindettemelerin oryndaǵanyna qaramastan, onyń bank shottaryndaǵy shekteýler tórt aı boıy alynbaǵan. Osy iske baılanysty tórt salyq qyzmetkeri ákimshilik jaýapqa tartyldy, olardyń birine 216 250 teńge aıyppul salyndy. Bul týraly óńirdegi prokýratýra málim etti.
Shymkent qalasy prokýratýrasynyń málimetinshe, Investorlardyń quqyqtaryn qorǵaý komıtetimen birlesip, memlekettik kirister organdary qyzmetkerleriniń ınvestorlardyń qyzmetine zańsyz aralasý faktilerin anyqtaǵan.
Prokýrorlyq qadaǵalaý barysynda memlekettik kirister organdary ınvestor – «White Fellow-Deer» JShS-nyń shyǵys operatsııalaryn toqtata turý týraly ákimshilik akt shyǵarǵany anyqtaldy.
Keıin kompanııa korporatıvtik tabys salyǵy boıynsha qosymsha salyq eseptiligin tapsyryp, habarlama talaptaryn oryndaǵan. Osylaısha, shyǵys operatsııalaryn toqtatýǵa negiz bolǵan sebepter joıylǵan.
Salyq kodeksiniń 86-baby 7-tarmaǵyna sáıkes, mundaı jaǵdaıda ákimshilik aktini shyǵarǵan salyq organy onyń kúshin sebepter joıylǵan kúnnen keıingi bir jumys kúninen keshiktirmeı joıýǵa mindetti.
— Alaıda Shymkent qalasy boıynsha Memlekettik kirister departamenti ınvestordyń shottary boıynsha shyǵys operatsııalaryn bir jumys kúni ishinde qalpyna keltirýdiń ornyna, ákimshilik aktiniń kúshin tek 4 aıdan keıin joıǵan, — dep habarlady prokýratýradan.
Osy fakti boıynsha kináli laýazymdy tulǵa Qazaqstan Respýblıkasynyń Ákimshilik quqyq buzýshylyq týraly kodeksiniń 173-baby boıynsha ákimshilik jaýaptylyqqa tartylyp, oǵan 216 250 teńge aıyppul salyndy.
Budan bólek, ınvestorlardyń bank shottaryna qoıylǵan shekteýlerdi ýaqtyly alyp tastamaǵan taǵy úsh salyq organynyń qyzmetkeri ákimshilik jaýaptylyqqa tartyldy.
Prokýratýra ınvestorlar men kásipkerlerdiń quqyǵyn qorǵaý, sondaı-aq olardyń qyzmetine zańsyz ákimshilik aralasý faktileriniń jolyn kesý jáne mundaı kedergilerdiń aldyn alý baǵytyndaǵy jumysty jalǵastyrady.
Shymkent qalasynyń prokýratýrasy ákimshilik kedergilerge tap bolǵan ınvestorlardy +7 (707) 615-00-10 telefony nemese 115 Call-ortalyǵy arqyly habarlasýǵa shaqyrady.
