Shymkentte ınternet kabelderi nege kesildi - ákimdik jaýaby
ShYMKENT. KAZINFORM – Qaladaǵy birneshe kóshede turǵyndar ınternetsiz qaldy. Tekserý nátıjesinde anyqtalǵandaı, kabel jelilerin demontajdaý ınternet-provaıderlerge birneshe ret eskertý jasalǵannan keıin bastalǵan.
Shymkent qalasy tsıfrlandyrý basqarmasynyń málimetine súıensek, demontajdaý týraly sheshim tekserý nátıjesinde qabyldanǵan. Tekserý barysynda baılanys jelileriniń syrtqy jaryqtandyrý tirekterine tıisti qujattarsyz jáne qaýipsizdik talaptaryn buza otyryp ornalastyrylǵany anyqtalǵan.
– Áleýmettik jelilerde Shymkenttiń birqatar kóshesinde ınternet kabelderiniń demontajdalýyna qatysty turǵyndardyń shaǵymdary jarııalanyp jatyr. Bul jumystar ınjenerlik jáne qaýipsizdik talaptaryn saqtamaı tartylǵan kabel jelilerin retke keltirý maqsatynda júrgizilip jatyr. Mundaı kabelder turǵyndardyń ómiri men densaýlyǵyna, sondaı-aq olardyń múlkine qaýip tóndirip, apattyq jaǵdaılardyń týyndaý qaýpin arttyrady, – dep habarlady basqarma ókilderi.
Vedomstvo málimetinshe, ınternet-provaıderlerge zańsyz tartylǵan kabelderdi óz kúshimen alyp tastaý týraly birneshe ret eskertý berilgen. Sonymen qatar olardy balamaly ınfraqurylymǵa kóshirý joldary usynylǵan.
– Kabelderdi demontajdaý qajettigi týraly resmı habarlamalar provaıderlerge 2025 jylǵy qarashada joldanyp, talaptardy oryndaýǵa jetkilikti ýaqyt berildi. Osy kezeńde birqatar kompanııa kabelderin óz erkimen demantajdady. Alaıda keıbir baılanys operatorlary belgilengen merzim ótkenine qaramastan, talaptardy áli oryndamaǵan, – dep málim etti basqarma.
Osyǵan baılanysty zańsyz tartylǵan kabelder qoldanystaǵy zańnamaǵa sáıkes jergilikti atqarýshy organ tarapynan májbúrli túrde demontajdalyp jatyr.
– Bul jumystar turǵyndardy ınternetten ajyratý úshin emes, qaýipsizdik talaptaryna saı kelmeıtin kabel jelilerin retke keltirip, qoǵamdyq qaýipsizdikti qamtamasyz etý maqsatynda júrgizilip jatyr, – dep atap ótti qala ákimdigi.
Shymkent turǵyndaryna ınternet qyzmetine kelisim jasamas buryn provaıderdiń qajetti ruqsat qujattaryn tekserý usynylady.
Buǵan deıin Shymkentte mobıldi baılanys sapasy tómen qansha aımaq bar ekenin jazǵan edik.
