Shymkentte ınternet-alaıaqtarǵa aldanǵan turǵyndardyń 214 mln teńgesi qaıtaryldy - polıtsııa
ShYMKENT. KAZINFORM – Shymkentte alty aıda ınternet-alaıaqtyqtyń 300-den astam deregi anyqtaldy.
Shymkent qalasy polıtsııa departamentiniń bastyǵy Muhtar Qojaevtyń aıtýynsha, 2026 jyldyń birinshi jartyjyldyǵynda qalada ınternet-alaıaqtyqtyń 330 faktisi tirkelgen.
– Qylmystardyń ashylý deńgeıi 41,3 paıyzdy kórsetip, respýblıkalyq ortasha kórsetkishten joǵary boldy. Jábirlenýshilerge 214 mln teńge qaıtaryldy. Sonymen qatar 3,3 myńnan astam bank shoty buǵattalyp, 15,5 mln teńgeniń zańsyz aýdarylýyna jol berilmedi, – dedi ol.
Vedomstvonyń málimetine súıensek, ınternet-alaıaqtyqtyń aldyn alý maqsatynda keń kólemdi aqparattyq-túsindirý jumystary júrgizilip, qylmystyq toptardyń zańsyz áreketine tosqaýyl qoıylǵan. Sonymen qatar dropperler men kıberqylmysqa qatysy bar tulǵalar ustalǵan.
Sondaı-aq qalada jumys istep turǵan ANTIFRAUD CALL CENTER ortalyǵy táýligine shamamen 1 700 alaıaqtyq qońyraýdy buǵattaıdy.
Buǵan deıin Shymkentte kıberqylmys jasaǵany úshin 37 adam jaýapqa tartylǵany týraly habarlaǵan edik.
