Shymkentte HQKO qyzmetkeri turǵyndardan 180 mln teńge aldap alǵan

ASTANA. KAZINFORM – Shymkent qalasynyń qylmystyq ister jónindegi aýdanaralyq sotynda Halyqqa qyzmet kórsetý ortalyǵynyń qyzmetkerine qatysty qylmystyq is aıaqtaldy.

Oblystyq sottyń resmı saıtyndaǵy málimetke sensek, sottalýshy A-ǵa Qylmystyq kodekstiń 190-baby 4-bóliginiń 2) tarmaǵy boıynsha (senimdi teris paıdalaný jolymen, aldap, birneshe ret asa iri mólsherde bótenniń múlkin jymqyrýmen alaıaqtyq jasaý) aıyp taǵylǵan.

Sot protsesi kezinde Shymkent qalasynyń Halyqqa qyzmet kórsetý ortalyǵynda bas maman qyzmetin atqarǵan sottalýshynyń birneshe azamatqa qarsy alaıaqtyq jasaǵany anyqtalǵan.

Ol 2022 jyly jábirlenýshi K esimdi adamǵa alańy 20,08 ga jer ýchaskesin jekeshelendirip berý, sol jerden testileý ortalyǵyn ashyp, birge jumys isteý, memlekettik baǵdarlamalar boıynsha arzan páter alyp berý týraly ýádeler aıtyp, 113 mln teńge alǵan.

Qalǵan 14 jábirlenýshiden memlekettik baǵdarlamalar boıynsha páter alyp beretinin aıtyp, 71 mln 356 myń teńge alǵan.

Sot onyń óz kinásin ishinara moıyndaǵanyn, shyn nıetpen ókinbegenin, 179 mln teńgeden asatyn zalal óndirilmegenin jáne jábirlenýshilerdiń keshirim bermegenin eskerip, 6 (alty) jyl 8 (segiz) aı merzimge bas bostandyǵynan aıyrý jazasyn taǵaıyndady.

Sot úkimi zańdy kúshine engen joq.