Shymkentte gazetterge tegin jazylý jeńildigi alynyp tastaldy
ShYMKENT. KAZINFORM — Qalalyq máslıhattyń sheshimimen Shymkentte qalanyń eki myńǵa jýyq turǵynyn qamtyǵan merzimdi basylymdarǵa tegin jazylý kúshin joıdy.
Shymkentte tyl eńbekkerlerine arnalǵan respýblıkalyq jáne jergilikti gazetterge tegin jazylym resmı túrde qyzmetin toqtatty. Jergilikti jeńildikterdi aýqymdy túrde tekserý maqsatynda ońtaılandyrý sharalary júrgizilip jatyr.
— QR Úkimetiniń eldegi áleýmettik kómek kórsetýdi úılestirý jónindegi tapsyrmasyna sáıkes, Shymkentte áleýmettik qoldaý tetikterin ońtaılandyrý sharalary júrgizilip jatyr. Osyǵan baılanysty tyl eńbekkerlerine merzimdi basylymdarǵa tegin jazylý múmkindigin alyp tastaý usynyldy. 2025 jyly bıýdjet qarajaty esebinen osy sanattaǵy eki myńnan astam azamat respýblıkalyq jáne jergilikti gazettermen qamtamasyz etilgen edi. 2026 jyldan bastap bul qoldaý toqtatylady. Sheshim bıýdjet qarajatyn tıimdi ári utymdy paıdalaný maqsatynda qabyldandy, — deıdi Shymkent qalasynyń jumyspen qamtý jáne áleýmettik qorǵaý basqarmasynyń bólim basshysy Maıra Káribaeva.
Osyǵan uqsas jaǵdaı buǵan deıin Uly Otan soǵysynyń ardagerlerine de qoldanyldy. Biraq bıyl Shymkentte Jeńis kúni maıdangersiz ótti. Óıtkeni 2025 jyly megapolıstiń sońǵy ardagerleri — Murataly Tólepbergenuly men Nına Mosýnova ómirden ótken edi.
Jeńildiktiń kúshin joıýǵa qalanyń normatıvtik-quqyqtyq bazasynyń ózgerýi zańdy negiz boldy.
— Ózgeristerdi júzege asyrý úshin depýtattar Shymkent qalalyq máslıhatynyń 2024 jylǵy 19 naýryzdaǵy «Áleýmettik kómek kórsetýdiń, onyń mólsherlerin belgileýdiń jáne muqtaj azamattardyń jekelegen sanattarynyń tizbesin aıqyndaýdyń qaǵıdalaryn bekitý týraly» sheshimine túzetýler engizdi. Qujat jobasy qalalyq máslıhattyń sessııasynda qaralyp, onyń qorytyndysy boıynsha merzimdi basylymdarǵa tegin jazylýdy usyný toqtatyldy, — dep habarlady Jumyspen qamtý jáne áleýmettik qorǵaý basqarmasynan.
2010-2015 jyly Shymkent ákiminiń orynbasary qyzmetin atqarǵan qalalyq máslıhattyń tóraǵasy Bahadyr Narymbetov sońǵy ózgeristerdiń tek jalpyrespýblıkalyq, áleýmettik biryńǵaı tólem júıesine kóshýmen baılanysty ekenin atap ótti.
— Esterińizde bolsa, bul bastamany ózim ákim orynbasary bolǵan tusta engizgen edim. Qazirgi kómek bıýdjetti únemdeý úshin toqtatylyp jatqan joq. Tólemder tıisti mınıstrliktiń tikeleı tapsyrmasymen búkil respýblıka boıynsha járdemaqylardyń biryńǵaı reestrine keltirilip jatyr, — dep habarlady Bahadyr Narymbetov.
Eske sala keteıik, Eńbek jáne halyqty áleýmettik qorǵaý mınıstrligi 2026 jyly jergilikti atqarýshy organdar kórsetetin áleýmettik kómektiń taǵy 13 túrin avtomattandyrý josparlanyp otyrǵanyn aıtqan bolatyn.
Járdemaqylar men áleýmettik tólemderdiń 11 túrin rásimdeýge múmkindik beretin otbasynyń tsıfrlyq kartasy reformanyń mańyzdy quralyna aınaldy. 1,2 myńnan astam qazaqstandyq proaktıvti formattaǵy qoldaýǵa ıe boldy.
Aıaýlym Qanatqyzy
