Shymkentte gazdan ýlanǵan segiz adam aýrýhanaǵa jatqyzyldy
ShYMKENT. KAZINFORM — Shymkent qalasy Abaı aýdanynda bir otbasynyń segiz múshesi tabıǵı gazdan ýlandy.
Oqıǵa ornyna Tótenshe jaǵdaılar departamenti jáne qalalyq orta sapasy jáne baqylaý basqarmasynyń qyzmetkerleri bardy.
— Aldyn ala boljam boıynsha, ýlaný sebebi — tútindik murjanyń qaýipsizdik talaptaryna saı bolmaýy. Ýlaný saldarynan segiz adam aýrýhanaǵa jatqyzyldy. Qazirgi ýaqytta zardap shekken azamattardyń jaǵdaıy qanaǵattanarlyq, barlyǵy medıtsınalyq baqylaýda, — delingen qalalyq Tótenshe jaǵdaılar departamenti taratqan aqparatta.
Osy oraıda, Shymkent qalasy Tótenshe jaǵdaılar departamenti turǵyndarǵa ýly gazdyń ıissiz ári asa qaýipti ekenin eskertedi. Sondaı-aq óz ómirińiz ben jaqyndaryńyzdyń qaýipsizdigine jaýapkershilikpen qarap, gaz jabdyqtaryn ýaqytyly teksertip, tútindik murjanyń durys ornatylǵanyn qadaǵalaýǵa jáne úı ishindegi gaz jabdyqtaryna tehnıkalyq qyzmet kórsetý boıynsha kelisimshart jasaýǵa shaqyrady.
Budan buryn elimizde datchık ornatýdyń arqasynda 248 adam gazdan ýlanýdan aman qalǵanyn jazǵan edik.