Shymkentte gaz jarylysynan bir adam qaza tapty, taǵy eki adam aýrýhanada jatyr

ShYMKENT. KAZINFORM — Shymkentte jeke turǵyn úıde gaz aýa qospasynyń jarylysy bolyp, bir adam qaza tapty, zardap shekken taǵy eki adam aýrýhanada em qabyldap jatyr. Bul aqparatty qalalyq tótenshe jaǵdaılar departamenti rastady.

Qaıǵyly jaǵdaı Abaı aýdanyna qarasty Yntymaq-2 shaǵynaýdanynda bolǵan. Shymkent qalasy Tótenshe jaǵdaılar departamentine órt oqıǵasy týraly habarlama túsken.

Anyqtalǵandaı, sirińke jaǵylyp, sonyń ásirinen úı ishinde jınalǵan gaz tutanyp, jarylys bolǵan.

— Oqıǵa ornyna jetkende órt sóndirýshiler kelgenge deıin gaz aýa qospasynyń tarsyly bolǵany anyqtaldy. Sonyń saldarynan 3 adam kúıik shalyp, aýrýhanaǵa jetkizildi, — dedi departament ókilderi.

Alaıda jaraqat saldarynan 30 jastaǵy er adam emhanada kóz jumdy.

Budan buryn Shymkentte gazdan ýlanǵan segiz adam aýrýhanaǵa jatqyzylǵanyn jazǵan edik.