Shymkentte fýtbolshylar arasyndaǵy tóbelesten keıin «Ordabasy» kapıtany qamaýǵa alyndy
ShYMKENT. KAZINFORM — Shymkentte «Ordabasy» men «Aqtóbe» klýbtarynyń jastar quramalary arasyndaǵy joldastyq match jappaı tóbelespen aıaqtaldy.
Oqıǵa 9 naýryz kúni Shymkentte ótken baqylaý matchynda bolǵan. Ekinshi taımnyń basynda oıyn barysynda fýtbolshylar arasynda janjal týyndap, sońy tóbeleske ulasqan. Kóp uzamaı eki komandanyń oıynshylary da janjalǵa aralasyp, jappaı qaqtyǵys bolǵan. Oqıǵanyń beınejazbasy áleýmettik jelilerde tarady.
«Aqtóbe» fýtbol klýbynyń málimetinshe, janjal kezinde jastar quramasynyń eki oıynshysy jaraqattanǵan.
— Eki fýtbolshymyz aýrýhanaǵa jetkizildi. Bireýine jaq súıeginiń synýy dıagnozy qoıyldy, ekinshisi erni men ıeginen jaraqattandy. Alǵashqy oıynshyǵa ota jasalady, — dep habarlady klýb ókilderi.
Klýb ókilderi alańdaǵy tártip buzýshylyqty aıyptap, oqıǵaǵa qatysty ádil tergeý júrgiziledi dep úmittenedi. Sondaı-aq jaraqattanǵan oıynshylarǵa qajetti medıtsınalyq kómek kórsetiletinin málimdedi.
Shymkent qalalyq polıtsııa departamenti tóbeles faktisi boıynsha qylmystyq is qozǵalǵanyn rastady.
— Joldastyq fýtbol matchy barysynda eki komanda oıynshylary arasynda janjal týyndap, ol tóbeleske ulasqan. Oqıǵa saldarynan qatysýshylardyń biri dene jaraqatymen aýrýhanaǵa jetkizildi. Atalǵan derek boıynsha buzaqylyq belgilerimen qylmystyq is qozǵaldy. Oqıǵaǵa qatysqan barlyq azamattar polıtsııa bólimshesine jetkizildi, — dep habarlady Shymkent qalalyq PD.
Tergeý barysynda janjaldyń bastalýyna «Ordabasy» komandasynyń kapıtany sebep bolǵany anyqtalǵan. Sot oǵan qatysty qamaýda ustaý túrindegi bultartpaý sharasyn qoldaný týraly sheshim qabyldady.
— Qazirgi ýaqytta oqıǵanyń barlyq mán-jaıyn jan-jaqty, tolyq ári obektıvti anyqtaýǵa baǵyttalǵan tergeý amaldary júrgizilip jatyr. Tergeý nátıjesi boıynsha qatysýshylardyń áreketterine zań aıasynda quqyqtyq baǵa beriledi, — dep málimdedi polıtsııa ókilderi.
Aıta keteıik, bul oqıǵa klýbtaǵy ózgeristermen qatar bolyp otyr. Buǵan deıin «Ordabasy» klýby basshylyq quramynyń aýysqanyn habarlaǵan bolatyn.
Klýb jekemenshik basqarýǵa ótip, jekeshelendirý jónindegi memorandýmǵa Shymkent qalasynyń ákimdigi men Integra Construction KZ kompanııasy qol qoıǵan.
