Farmatsevtıkalyq óndiristi keńeıtý úshin 39,5 mlrd teńge ınvestıtsııa baǵyttalady
ASTANA. KAZINFORM — Tıisti qaýlyǵa Premer-mınıstr Oljas Bektenov qol qoıdy. Bul týraly Úkimettiń baspasóz qyzmeti habarlady.
Memleket basshysynyń farmatsevtıka salasyndaǵy otandyq óndiristiń úlesin ulǵaıtý jónindegi tapsyrmalary sheńberinde Qazaqstan Respýblıkasynyń Úkimeti Densaýlyq saqtaý mınıstrligi men «Hımfarm» AQ arasynda «Halyqty neǵurlym qoljetimdi dárilik preparattarmen qamtamasyz etý jáne Qazaqstan Respýblıkasynyń farmatsevtıka ındýstrııasyndaǵy otandyq dári-dármek óndirisiniń úlesin ulǵaıtý» jobasy boıynsha jasalǵan Investıtsııalar týraly kelisimdi maquldady.
Tıisti qaýlyǵa Premer-mınıstr Oljas Bektenov qol qoıdy.
Joba qazaqstandyq taýar óndirýshilerdiń úlesin arttyrýǵa, eldiń dárilik qaýipsizdigin nyǵaıtýǵa jáne ınvestıtsııalardy tartýǵa baǵyttalǵan.
Kelisim Shymkent qalasyndaǵy Polpharma Santo kompanııasynda 300 jańa jumys ornyn asha otyryp, iri ınvestıtsııalyq jobanyń jańa kezeńiniń bastalýyna jol ashty. Jeke ınvestıtsııalardyń jalpy kólemi ǵylymı zertteýlerdi damytýǵa baǵyttalǵan qarajatty qosa alǵanda 39,5 mlrd teńge. Jańa óndiristiń birinshi kezeńin iske qosý 2029 jyldyń sońyna josparlanyp otyr.
Jańa óndiristik qýattar onkologııalyq, júrek-qan tamyr, ınfektsııalyq jáne sozylmaly aýrýlardy, sonyń ishinde týberkýlezdi emdeýge arnalǵan 38 túrli dárilik zatty shyǵarýǵa múmkindik beredi. Óndiris halyqaralyq sapa standarttaryna sáıkes keledi.
Joba memlekettiń strategııalyq mindetterine sáıkes keledi, salanyń turaqty tehnologııalyq bazasyn qalyptastyrady, halyq úshin dárilik zattardyń sapasy men qoljetimdiligin qamtamasyz etýge, sondaı-aq eksporttyq áleýetti nyǵaıtýǵa baǵyttalǵan.
Jalpy alǵanda, farmatsevtıkalyq ónimder óndirisi salasynda 316,3 mlrd teńge somasyna 6 ınvestıtsııalyq kelisim jasaldy, bul salanyń kezeń-kezeńimen damyp kele jatqanyn, ınvestıtsııalyq tartymdylyǵynyń artýyn, óndiristi lokalızatsııalaý úshin ornyqty bazanyń qalyptasýyn jáne eldiń dárilik qaýipsizdiginiń nyǵaıýyn kórsetedi.
Aıta ketelik elde úndistandyq dárini paıdalanýǵa tyıym salynǵan edi.