Shymkentte farmatsevtıkalyq qyzmet salasynda 73 zań buzýshylyq anyqtaldy
ShYMKENT. KAZINFORM – Shymkentte dárilik zattardy satý jáne saqtaý talaptarynyń buzylǵany belgili boldy.
Densaýlyq saqtaý mınıstrligi Farmatsııa komıteti departamentiniń basshysy Aıgúl Sadyqovanyń aıtýynsha, qalada farmatsevtıkalyq qyzmetpen aınalysatyn 868 nysan bar. Onyń 650-i – dárihana.
– 2026 jyldyń toǵyz aıynda júrgizilgen tekserýler nátıjesinde 73 zań buzýshylyq anyqtaldy. Olardyń 34-i boıynsha zań buzýshylyqtardy joıý týraly nusqama berildi. Sondaı-aq 53 ákimshilik is qozǵalyp, salynǵan aıyppuldardyń jalpy somasy 15,7 mln teńgeden asty, – dedi Aıgúl Sadyqova.
Jıi kezdesetin zań buzýshylyqtar qatarynda farmatsevtıkalyq qyzmetti zańsyz júzege asyrý, dárilik zattardy retseptsiz satý, sondaı-aq tirkelmegen preparattardy saqtaý jáne ótkizý bar.
Spıkerdiń sózinshe, halyqqa tegin berilýge tıis dári-dármekterdi zańsyz satýdyń jolyn kesýge erekshe nazar aýdarylyp otyr.
Dárilik zattardyń aınalymyn baqylaý úshin ISMET.KZ tańbalaý júıesi qoldanylady. Al «NAQTY ONYM» mobıldi qosymshasy arqyly dárilik zat týraly aqparat pen onyń shekti baǵasyn tekserýge bolady. Zań buzýshylyq anyqtalǵan jaǵdaıda «E-ótinish» júıesi arqyly shaǵym joldaý múmkindigi qarastyrylǵan.
Buǵan deıin elimizde merzimi ótken dárilerdiń 7,5 myń ret satylǵany týraly habarlaǵan edik.
