Shymkentte esirtkini jarnamalaıtyn graffıtı salǵan jáne esirtki taratqan kúdikti ustaldy
ASTANA. KAZINFORM – Shymkent qalasynyń polıtsııa qyzmetkerleri reıdtik is-sharalar barysynda sıntetıkalyq esirtki zattaryn taratýmen aınalysqan jas jigitti qolǵa túsirdi. Kúdiktini tintý kezinde zańsyz aınalymnan ótkizýge daıyndalǵan, ishinde psıhotroptyq zattary bar 40-qa jýyq orama tárkilendi.
Jedel-tergeý amaldarynyń nátıjesinde ustalǵan azamattyń qala aýmaǵynda tyıym salynǵan zattardy arnaıy jasyryn oryndarǵa (zakladka) tyǵyp, olardyń geolokatsııalyq koordınattaryn messendjerler arqyly satyp alýshylarǵa joldap otyrǵany anyqtaldy. Sonymen qatar, kúdiktiniń shahardaǵy ǵımarattardyń qabyrǵalaryna esirtki quraldaryn saýdalaıtyn ınternet-resýrstardy nasıhattaıtyn graffıtı jazbalaryn salýmen aınalysqany belgili boldy.
Atalǵan quqyq buzýshylyq derekteri boıynsha qylmystyq ister qozǵalyp, qazirgi ýaqytta qajetti tergeý áreketteri júrgizilip jatyr.
Qazirgi tańda Shymkent qalasynda esirtki quraldarynyń zańsyz jarnamasyn anyqtaýǵa jáne ony joıýǵa baǵyttalǵan «Stop-graffıtı» jedel-profılaktıkalyq is-sharasy iske asyrylýda. Osy ýaqytqa deıin arnaıy shara aıasynda, ásirese bilim berý mekemeleriniń mańynda ornalasqan 400-ge jýyq esirtkini jarnamalaıtyn zańsyz jazba joıyldy. Páter ıeleri kooperatıvteri men quqyq qorǵaý organdarynyń bul baǵyttaǵy júıeli jumystary turaqty túrde jalǵasady.
Buǵan deıin habarlaǵanymyzdaı, Memlekettik qyzmetshiler mindetti esirtki skrınınginen ótedi.
