Shymkentte esirtkige qatysty oqıǵadan keıin polıtseı jumystan shyǵaryldy
ShYMKENT. KAZINFORM – Shymkentte esirtkini zańsyz saqtaý deregine baılanysty aýdandyq polıtsııa bóliminiń qyzmetkeri ishki ister organdarynan teris qylyǵy úshin bosatyldy. Jedel is-sharalar barysynda onyń basqa azamattarmen birge avtokólikte bolǵany anyqtaldy.
Buǵan deıin áleýmettik jelilerde memlekettik tirkeý nómiri joq Kia avtokóligin qýý jáne ony ustaý sáti túsirilgen beınejazba taraǵan bolatyn. Jazba avtorlarynyń málimetinshe, kólik júrgizýshisi polıtsııa kóligin soǵyp, oqıǵa ornynan qashýǵa tyrysqan. Sondaı-aq avtokólik salonynda polıtsııa qyzmetkeri bolǵany jáne kólikti tekserý kezinde esirtki tabylǵany habarlandy.
Oqıǵanyń mán-jaıyn naqtylaý úshin Kazinform tilshisi Shymkent qalalyq polıtsııa departamentine saýal joldady. Vedomstvo esirtkini zańsyz saqtaý deregin rastady.
– Shymkent qalalyq polıtsııa departamentiniń uıymdasqan qylmysqa qarsy kúres basqarmasynyń qyzmetkerleri jedel is-sharalar barysynda esirtkini zańsyz saqtaý faktisin anyqtady. Avtokólikte azamattyq tulǵalarmen birge aýdandyq polıtsııa bólimderiniń biriniń qyzmetkeri bolǵan. Atalǵan qyzmetker ishki ister organdarynan teris sebeptermen jumystan shyǵaryldy, – dep habarlady qalalyq polıtsııa departamenti.
Oqıǵanyń mán-jaıyn anyqtaý jumystary jalǵasyp jatyr. Polıtsııanyń málimetinshe, burynǵy qyzmetkerdiń áreketterine quqyqtyq baǵa beriledi.
– Qazirgi ýaqytta qajetti tergeý áreketteri júrgizilip jatyr. Oqıǵanyń barlyq mán-jaıyna, onyń ishinde burynǵy polıtsııa qyzmetkeriniń áreketterine de tıisti quqyqtyq baǵa beriledi. Tergeý múddesine baılanysty QR QPK-niń 201-babyna sáıkes ózge aqparat jarııa etilmeıdi, – dep naqtylady vedomstvo.
Eske salaıyq, buǵan deıin Astanada 30 jastaǵy áıeldiń ólimine baılanysty tórt polıtsııa qyzmetkeri ustalǵanyn habarlaǵan edik. Olar qyzmettik mindetterine salǵyrt qarady degen kúdikke ilindi. Osy oqıǵadan keıin Astana qalalyq polıtsııa departamenti bastyǵynyń orynbasary qyzmetinen bosatyldy.
