Shymkentte esirtkige qatysty qylmys jasaýshylardyń basym bóligi — er adamdar

ShYMKENT. KAZINFROM – Jyl basynan beri Shymkentte esirtki qylmysyna qatysty 447 jaǵdaı tirkelgen. Onyń ishinde 397 adamǵa sot úkimi shyqty. Bul týraly Shymkent qalasy prokýrorynyń orynbasary Erjan Marat málimdedi.

Quqyq qorǵaý organdary qyzmetkerleriniń aıtýynsha, esirtki qylmysyn jasaýshylardyń basym kópshiligin er adamdar quraıdy. Onyń ishinde 40 jastan asqandar kóp.

«Esirtkiniń eń kóp taraǵan túri sıntetıka. Sebebi, óte arzan, ári daıyndaýda óte ońaı. Sondaı-aq, basqa esirtkige qaraǵanda munyń zardaby da kóp. Sondyqtan sıntetıkaǵa baılanysty kúreste nátıjege jetý úshin birneshe talaptar qoıylýda», - dedi Erjan Marat.

Al, Shymkent qalasy polıtsııa departamenti basshynyń orynbasary Arman-Arýn Beısenbıev ınternet arqyly esirtki satýdyń jazasy aýyr bolatyndyǵyn jetkizdi.

«Internet jelisinde esirtki satqany úshin qylmystyq jaýapkershilik 10 jyldan bastalady. Al, kontrabandamen baılanysta bolý ómir boıy bas bostandyǵynan aıyrýǵa alyp keledi. Búginde ınternette 2000-nan astam paraqsha joıylǵanyna qaramastan, jańasy qaıta ashylyp jatyr. Sondaı-aq, kúndelikti buǵattaý jumystary da júrýde. Esirtki satýshy, satyp alýshy, tasymaldaýshy, tyǵýshy birin-biri tanymaıdy. Sondyqtan anyqtaý jumystary qıyndyq týdyrady. Biraq soǵan qaramastan polıtsııa 400-den astam esitkige qatysty qylmystardy anyqtady. Sonyń ishinde 75-i esirtki satýmen baılanysty. Al, onyń 70 paıyzy ınternet jelisinde oryn alǵan qylmystar», - dedi Arman-Arýn Beısenbıev.