Shymkentte esirtki saıttaryn jarnamalaǵan kúdikti ustaldy
ASTANA. KAZINFORM — Shymkentte polıtseıler jedel is-sharalar barysynda esirtkiniń zańsyz aınalymyna qatysty ınternet-resýrstardyń jarnamasyn taratqan jergilikti turǵyndy ustady.
Tergeý barysynda er adamnyń qala aýmaǵynda esirtki satatyn tyıym salynǵan saıttardyń jarnamasy bar japsyrmalardy ornalastyrǵany anyqtaldy. Jarnamalyq materıaldarda joǵary jalaqy tólenetin jumys usynylyp, esirtki zattaryn taratýǵa qatysty ınternet-resýrstardyń mekenjaılary kórsetilgen.
Esirtki saıttarynyń jarnamasy bar japsyrmalar tárkilendi. Qazirgi ýaqytta tergeý áreketteri júrgizilip jatyr.
Polıtsııa eskertedi: esirtki quraldaryn, psıhotroptyq zattar men sol tektesterdi nasıhattaý nemese jarnamalaý — múlikti tárkileý jáne 3 jylǵa deıingi merzimge bas bostandyǵynan aıyrý jazasyna ákep soǵady.
Al bilim berý uıymdarynda, sondaı-aq adamdar kóp jınalatyn oryndarda esirtki quraldaryn jarnamalaý nemese nasıhattaý, sondaı-aq mundaı áreketterdi birneshe ret jasaý — múlikti tárkileýmen qatar, 3 jyldan 6 jylǵa deıingi merzimge bas bostandyǵynan aıyrýǵa ákep soǵady.
Aıta ketelik esirtkige táýeldilik máseleleri boıynsha keńes beretin jańa servıs iske qosylǵan edi.
