Shymkentte erli-zaıyptydan 2 kelige jýyq mefedron tárkilendi
ASTANA. KAZINFORM – Shymkentte polıtsııa qyzmetkerleri eki kelige jýyq mefedron tárkilep, sıntetıkalyq esirtkini óńirlerge jetkizýmen aınalysty degen kúdikpen erli-zaıyptyny ustady, dep habarlaıdy Polisia.kz.
Іshki ister mınıstrliginiń málimetinshe, jedel-izdestirý is-sharalary barysynda Qaraǵandy qalasynyń 48 jastaǵy turǵyny men onyń 37 jastaǵy jubaıy qolǵa túsken. Tergeý deregine sáıkes, olar jeke avtokólikpen sıntetıkalyq esirtkiniń iri partııasyn Almatydan Shymkentke jetkizip, keıin elimizdiń ońtústik óńirlerine taratýdy kózdegen.
Kólikti tekserý kezinde júksalǵyshtan jalpy salmaǵy eki kelige jýyq mefedron salynǵan germetıkalyq tórt orama tabyldy.
– Ustalǵandardyń telefondaryn tekserý barysynda ınternet arqyly jumys isteıtin esirtki dúkeniniń kýratorymen jazysqan hat-habarlary anyqtaldy. Sondaı-aq esirtkini tasymaldaǵany úshin krıptovalıýta arqyly tólengen syıaqylar týraly málimetter tabyldy, – delingen ІІM habarlamasynda.
Vedomstvonyń málimetinshe, erli-zaıyptynyń qamqorlyǵynda kámeletke tolmaǵan úsh bala bolǵanyna qaramastan, olar zańsyz tabys tabý jolyn tańdaǵan. Jaýap alý kezinde kúdiktiler kinálaryn tolyq moıyndaǵan.
Medıtsınalyq kýálandyrý nátıjesinde er adamnyń kannabıs tobyna jatatyn esirtki zattaryn paıdalanǵany anyqtaldy. Qazirgi ýaqytta kúdiktiler ýaqytsha ustaý ızolıatoryna qamalyp, sotqa deıingi tergep-tekserý jalǵasyp jatyr.
– Joly kesilgen árbir esirtki ótkizý arnasy – der kezinde toqtatylǵan qaýip jáne eń aldymen jastardy esirtkiniń joıqyn áserinen qorǵaý. Іshki ister mınıstrligi esirtki jelileriniń qyzmetin olardyń jasyryný tásilderine qaramastan, meıli kóshede bolsyn, meıli tsıfrlyq keńistikte bolsyn, qatań ári dáıekti túrde toqtatý jumysyn jalǵastyrady, – dep málimdedi vedomstvo.
Aıta keteıik, Óskemende eki jigitten 90-nan astam esirtki oramasy tárkilendi.
