Shymkentte erekshe jandarǵa arnalǵan zamanaýı ońaltý ortalyǵy salynyp jatyr
ShYMKENT. KAZINFORM – Shymkent qalasynda erekshe kútimdi qajet etetin azamattarǵa arnalǵan 150 oryndyq zamanaýı ońaltý ortalyǵynyń qurylysy júrgizilip jatyr.
Joba Memleket basshysynyń tapsyrmasy aıasynda júzege asýda.
Qala ákimdiginiń málimetinshe, qurylys jumystary 2024 jyldyń jeltoqsan aıynda bastalǵan. Nysan Bozaryq shaǵynaýdanynda ornalasqan.
Keshenniń jalpy aýmaǵy 5,3 gektardy quraıdy. Joba bes bloktan turady jáne halyqaralyq talaptarǵa saı jabdyqtalady.
Ortalyqta І jáne ІІ toptaǵy múgedektigi bar azamattarǵa jartylaı statsıonarlyq formatta arnaýly áleýmettik qyzmetter kórsetiledi.
Bul qyzmetter erekshe jandardyń ómir sapasyn arttyrýǵa, qoǵamǵa beıimdelýine jáne áleýmettik qoldaýdy kúsheıtýge baǵyttalǵan.
Joba aıasynda sport zaly, emdik-saýyqtyrý basseıni, akt zaly, úsh qabatty ońaltý korpýsy, keń ashana, eki qabatty statsıonar jáne qosymsha tehnıkalyq nysandar qarastyrylǵan.
Qazirgi ýaqytta qurylys jumystarynyń 60 paıyzy aıaqtalǵan.
– Barlyq jumys tıisti talaptar men sapa standarttaryna sáıkes júrgizilýde. Nysan qurylysynda 262 jumysshy eńbek etip jatyr, – dep málimdedi qala ákimdiginiń baspasóz qyzmeti.
Jobany 2026 jyldyń jeltoqsan aıynda aıaqtap, paıdalanýǵa berý josparlanyp otyr.
Ákimdik ókilderiniń aıtýynsha, bul bastama Shymkenttiń áleýmettik jaýapkershiligi joǵary megapolıs retindegi áleýetin arttyryp, turǵyndar úshin qolaıly ári qamqor orta qalyptastyrýǵa múmkindik beredi.
