Shymkentte er adam 23 jyl burynǵy qylmysy úshin sottaldy
ShYMKENT. KAZINFORM — Shymkent qalasynyń qylmystyq ister jónindegi mamandandyrylǵan aýdanaralyq soty 23 jyl buryn asa iri mólsherde geroın tasymaldaýǵa qatysty qylmystyq is boıynsha úkim shyǵardy.
Sotta anyqtalǵandaı, sottalýshy 2003 jyldyń tamyz aıynda esirtki zattaryn kóterme baǵamen satyp alyp, olardy basqa memleketterde satýmen aınalysqan halyqaralyq uıymdasqan qylmystyq toptarmen turaqty baılanysta bolǵan.
2003 jyldyń qazan aıynyń basynda ol qylmystyq qoǵamdastyqtaǵy ózine júktelgen mindetterdi oryndaý barysynda top basshysynan asa iri mólsherdegi geroındi ótkizý týraly tapsyrma alǵan.
Sottalýshy atalǵan tapsyrmany oryndaý maqsatynda 2003 jylǵy 20 qarashada sybaılasymen birge Shymkentten Aqtóbe baǵytyna jolǵa shyqqan.
Alaıda 22 qarashada Shymkent — Samara avtojolynyń Aral qalasy mańynda sottalýshy otyrǵan kólik toqtatylǵan. Avtokólikti tekserý barysynda janarmaı quıý ornynan untaq tárizdi zat salynǵan 35 paket, ıaǵnı jalpy salmaǵy 34 047,41 gramm asa iri mólsherdegi geroın tárkilengen.
Osy oqıǵadan keıin sottalýshy halyqaralyq izdeýge jarııalanǵan. Ol 2024 jyly Reseı Federatsııasynyń aýmaǵynda ustalyp, 2025 jyly Qazaqstanǵa jetkizilgen.
Sottalýshy kinásin moıyndamaǵanyna qaramastan, onyń qylmys jasaǵany kýálardyń jaýaptarymen, dybys jazbalarymen, saraptama qorytyndylarymen jáne basty sot talqylaýynda zerttelgen basqa da is materıaldarymen tolyq dáleldendi.
Prokýror sottalýshyǵa bas bostandyǵynan aıyrý jazasyn taǵaıyndaýdy surady. Al sottalýshy taǵylǵan aıypty moıyndamaı, ózin aqtaýdy ótindi. Sot onyń qylmystyq jaýaptylyǵy men jazasyn jeńildetetin jáne aýyrlatatyn mán-jaılardy anyqtamady.
— Sot E.-ny QK-niń (1997 jylǵy redaktsııada) 235-babynyń 3-bóligimen, 259-babynyń 4-bóliginiń «a», «b» tarmaqtarymen kináli dep tanyp, oǵan túpkilikti 13 jyl merzimge bas bostandyǵynan aıyrý jazasyn taǵaıyndady, — delingen qalalyq sottyń habarlamasynda.
Úkim zańdy kúshine endi.
Buǵan deıin Shymkentte esirtki saıttaryn jarnamalaǵan kúdiktiniń ustalǵanyn jazǵan edik.
