Shymkentte er adam naýqasty soqqyǵa jyǵyp, aýrýhanada polıtsııaǵa qarsylyq bildirgen

ShYMKENT. KAZINFORM — Nátıjesinde zardap shekkenderdiń biri jabyq bas mı jaraqatyn aldy.

Oqıǵanyń vıdeosy áleýmettik jelilerde taraldy. Kadrlarda er adamnyń dóreki sózder aıtyp, naýqasty uryp, polıtsııa qyzmetkerin ıterip jatqany aıqyn kórinedi. Sonymen qatar, ol ultaralyq arazdyqty qozdyratyn sózder aıtady.

— 9 tamyz túngi ýaqytta № 1 qalalyq klınıkalyq aýrýhananyń qabyldaý bóliminde patsıentterge ilesip kelgen azamattardyń arasynda janjal shyqty. Janjal barysynda bir azamat jabyq bas mı jaraqatyn alyp, aýrýhanaǵa jatqyzyldy. Onyń jaǵdaıy turaqty dep baǵalanady. Oqıǵa týraly dereý polıtsııaǵa habarlandy, — dep habarlady qala densaýlyq saqtaý basqarmasy.

Atalǵan fakti boıynsha qylmystyq is qozǵaldy.

— Kúdikti ustalyp, ýaqytsha ustaý ızolıatoryna qamaldy. Oqıǵanyń barlyq jaǵdaılaryn anyqtaýǵa baǵyttalǵan keshendi tergeý is-sharalary júrgizilip jatyr. Tergeýdiń barysy polıtsııa basshylyǵynyń baqylaýynda, — dedi Shymkent polıtsııa departamentinen.

Aıta keteıik, budan buryn Shymkenttegi «polkovnık saraıy» týraly feık qylmystyq iske ulasqanyn jazǵan bolatynbyz.