Shymkentte Eńbek mınıstrligi departamentiniń eks-basshysy para bergeni úshin sottaldy

ASTANA. KAZINFORM — Shymkentte Eńbek mınıstrligi departamentiniń burynǵy basshysyna tótenshe jaǵdaılar departamentiniń qyzmetkerine para bergeni úshin 1,2 mıllıon teńgege jýyq aıyppul salyndy. Sot úkimi zańdy kúshine endi.

sot
Foto: pexels

Shymkent qalasynyń qylmystyq ister jónindegi aýdanaralyq soty Halyqty áleýmettik qorǵaý salasyndaǵy retteý jáne baqylaý komıteti departamentiniń burynǵy basshysy Rýslan Tuńǵyshbaev pen Turan aýdanynyń tótenshe jaǵdaılar basqarmasynyń burynǵy bas mamany Azamat Buldyryqovqa qatysty sybaılas jemqorlyq isin qarady. Ekeýi de kinásin tolyq moıyndap, tergeý jınaǵan dálelderge daý aıtpaǵan. Іs qysqartylǵan tártippen qaraldy.

Sot anyqtaǵandaı, 2026 jylǵy mamyrda Turan aýdanynyń tótenshe jaǵdaılar basqarmasy Tuńǵyshbaev basshylyq etken departamentte órt qaýipsizdigi men azamattyq qorǵanys talaptarynyń saqtalýyna tekserý taǵaıyndaǵan. Tekserý Buldyryqovqa tapsyrylǵan. Ol 28 mamyr men 3 maýsym aralyǵynda 23 zańbuzýshylyqty anyqtap, mekeme basshysyna aýyzsha habarlaǵan.

Tuńǵyshbaev eskertýler tizimin qysqartyp, aktide mekeme óz kúshimen joıa alatyn zańbuzýshylyqtardy ǵana qaldyrýdy suraǵan. Nátıjesinde 3 maýsymda Buldyryqov bastapqyda anyqtalǵan 23 zańbuzýshylyqtyń ornyna 16-syn kórsetip, akt rásimdegen.

Kelesi kúni departament basshysy tekserýshini qyzmettik kabınetine shaqyryp, tekserý nátıjesin ózgertkeni úshin oǵan 100 myń teńge bergen.

9 maýsymda Buldyryqov Shymkent qalasy boıynsha UQK departamentine baryp, qylmys týraly aryz túsirip, kinásin moıyndaǵan.

Tergeý barysynda iske qatysýshylardyń tekserý nátıjeleri, anyqtalǵan zańbuzýshylyqtar men para somasy týraly sóılesken jazbalary alynǵan. Sonymen qatar profılaktıkalyq baqylaý qujattary men aqsha tárkilengen. Bul materıaldar is boıynsha dálel retinde tanyldy.

Sot otyrysynda Tuńǵyshbaev zańbuzýshylyqtar sanyn azaıtý úshin 100 myń teńge usynǵanyn jáne aqshany TJD qyzmetkerine ózi bergenin rastady. Buldyryqov para alǵanyn jáne tekserý aktisine ózgeris engizgenin moıyndady. Ekeýi de ókinip, aıyppul taǵaıyndaýdy surady.

Jaza taǵaıyndaý kezinde sot aıyptalýshylardyń buryn sottalmaǵanyn, kinásin moıyndap, ókingenin eskerdi. Tuńǵyshbaevtyń alty balasy bar, onyń úsheýi kámeletke tolmaǵan. Al Buldyryqovtyń asyraýynda tórt kishkentaı balasy men zeınet jasyndaǵy ata-anasy bar. Sot burynǵy TJD qyzmetkeriniń kásibı antyn buzýyn jazany aýyrlatatyn mán-jaı dep tanydy. Tuńǵyshbaevqa qatysty aýyrlatatyn mán-jaılar anyqtalmady.

Rýslan Tuńǵyshbaev QR Qylmystyq kodeksiniń 367-babynyń 1-bóligi («Para berý») boıynsha kináli dep tanyldy. Sot oǵan 1,5 mıllıon teńge aıyppul saldy. Alty kún qamaýda jáne 23 kún úıqamaqta bolǵan ýaqyty esepke alynǵannan keıin aıyppuldyń túpkilikti somasy 1 197 250 teńge bolyp belgilendi.

Azamat Buldyryqov QR Qylmystyq kodeksiniń 366-babynyń 1-1-bóligi («Para alý») boıynsha sottaldy. Oǵan 2,5 mıllıon teńge aıyppul salynyp, azamattyq qorǵaý maıory ataǵynan aıyryldy.

Ekeýine de memlekettik qyzmette, memlekettik uıymdar men kvazımemlekettik sektorda, sondaı-aq sot, jergilikti ózin-ózi basqarý organdarynda, Ulttyq bankte jáne úkimde kórsetilgen ózge de qurylymdarda qyzmet atqarýǵa ómir boıyna tyıym salyndy.

Sot múlikti tárkileý jazasyn qoldanbady. Tergeý kezinde aıyptalýshylardan zańsyz jolmen alynǵan nemese qylmystyq tabysqa satyp alynǵan múlik tabylmaǵan.

Sottalǵandarǵa aıyppuldy úkim zańdy kúshine engen kúnnen bastap bir aı ishinde óz erkimen tóleý mindetteldi. Tólemegen jaǵdaıda aıyppuldyń ótelmegen bóligi bas bostandyǵynan aıyrý jazasyna aýystyrylýy múmkin.

Tárkilengen 100 myń teńge memleket kirisine ótkizildi. Sonymen qatar Tuńǵyshbaevtan 64 875 teńge, Buldyryqovtan 86 500 teńge jábirlenýshilerge ótemaqy tóleý qoryna óndirildi.

Eske salaıyq, buǵan deıin Pavlodarda probatsııa qyzmetiniń burynǵy ınspektory para alǵany úshin 12 mln teńge aıyppul arqalaǵanyn habarlaǵanbyz.