Shymkentte emhananyń bas býhgalteri 7,5 jylǵa sottaldy

ShYMKENT. KAZINFORM —  Shymkentte dene shynyqtyrý jáne sport basqarmasyna qarasty emhananyń bas býhgalterine qatysty iske núkte qoıyldy. Úkim qylmystyq ister jónindegi aýdanaralyq sotynda oqyldy.

Bas esepshige Qylmystyq kodekstiń 189-babynyń 4-bóliginiń 2-tarmaǵymen qyzmet babyn paıdalana otyryp, asa iri mólsherde bótenniń senip tapsyrylǵan múlkin ıelendi degen aıyp taǵyldy. 

Joǵarǵy sottyń málimetinshe, bas býhgalter bir jyl boıy qyzmetkerlerdiń shotyna jalaqysynan asyp túsetin qarajatty aýdaryp kelgen. Keıin olardan artyq aqshany dosynyń bank kartasyna qaıtarýdy suraǵan. Osylaısha memleket qarjysyn ıemdenip, óz qajettilikterine jaratqan. 

Memleketke keltirilgen shyǵyn — 29 mıllıon teńgeden asady.  

Sottalýshy óz kinásin ishinara moıyndap, sottan bas bostandyǵynan aıyrýmen baılanysty emes jaza taǵaıyndaýdy surady. 

Sot úkimimen bas býhgalter kináli dep tanylyp, oǵan 7,5 jylǵa bas bostandyǵynan aıyrý jazasy taǵaıyndaldy. Budan ózge sottalýshy ómir boıyna memlekettik qyzmette laýazymdardy atqara almaıdy. 

Úkim zańdy kúshine engen joq. 

Biz buǵan deıin Shymkent ákiminiń burynǵy orynbasary sottalǵany týraly jazdyq. Eks-sheneýnikke laýazymdy qyzmetti atqaryp júrgende Ulttyq qaýipsizdik komıtetiniń Shymkent qalalyq departamenti basshysynyń birinshi orynbasaryna para berýge oqtaldy degen aıyp taǵyldy.