Shymkentte elimizdegi eń úlken jylyjaı salynady

ShYMKENT. KAZINFORM — Shymkentte 650 gektar jerge elimizdegi eń úlken jylyjaı salynady. Bul týraly qala ákimi Ǵabıt Syzdyqbekov aıtty.

«Úkimettiń 2028 jylǵa deıingi bekitilgen josparyna sáıkes, qalaǵa 5,6 trln teńge ınvestıtsııa tartý kózdelgen. Búginniń ózinde 2,7 trln teńge bolatyn 30 myńnan asa jańa jumys ornymen 220 ınvestıtsııalyq jobanyń pýly jasaqtaldy. Onyń ishinde, kelesideı iri jobalar bar: «Alarko Holding» túrik kompanııasy 650 gektar jerge salatyn quny 650 mln AQSh dollarlyq elimizde aýmaǵy jaǵynan eń úlken zamanaýı jylyjaı kesheni jobasy. Onyń 500 gektaryna jylyjaı, qalǵan 150 gektarǵa oqý korpýsy, qoıma, zerthana men jataqhanalar salynady. Joba kezeń-kezeńmen júzege asyrylady. Búgingi tańda, ınvestıtsııa quny 226 mln AQSh dollaryn quraıtyn jobanyń 1 kezeńine 208 gektar jer telimi bólinip, jerdi daıyndaý jumystary bastaldy», — dedi qala ákimi OKQ alańynda.

Sondaı-aq, Ǵabıt Syzdyqbekov ótken aptada polshalyq «Fabe Polska» kompanııasymen quny 200 mln AQSh dollaryn quraıtyn 150 gektar aýmaqqa joǵary tehnologııaly jylyjaı salý boıynsha kelisimge qol qoıylǵanyn aıtty. Munda jylyna 36 myń tonna qyzanaq pen qııar ónimi alynyp, 800-den astam adam jumyspen qamtylady.

Qala basshysy jylyjaılardan bólek taǵy iri eki jobany atap ótti. 

«AKSA energy» kompanııasy quny 700 mln AQSh dollary bolatyn qýattylyǵy 500 MVt bý gaz qondyrǵysyn salady. Jobany iske asyrý arqyly qala turǵyndary sapaly elektr jáne jylý energııasymen qamtamasyz etiledi. Taǵy bir iri joba — «INTERTRANS» kompanııasynyń 150 mln AQSh dollaryna munaı ónimderin tereń óńdeý arqyly untaqtalǵan polıpropılen óndiretin zaýyt salýy. Jobany iske asyrýǵa 30 gektar jer telimi bólindi», — dedi ol.

Aıta keteıik, buǵan deıin qala basshysy Shymkentte óńdeý ónerkásibi salasynda 12 joba iske qosylyp, 1000-nan astam jańa jumys orny ashylǵanyn aıtqan bolatyn.

Sondaı-aq, qalada jańadan 2 ındýstrııalyq aımaq iske qosylǵany aıtyldy.