Shymkentte 35 myń adamǵa arnalǵan elimizdegi eń úlken stadıonnyń irgetasy qalandy
ShYMKENT. KAZINFORM – Shymkentte halyqaralyq standarttaǵa saı eń úlken stadıonnyń irgetasyn qalaý is-sharasy ótti. Oǵan qala ákimi Ǵabıt Syzdyqbekov pen birqatar fýtbolshy qatysty.
Atalǵan sport nysany Bozaryq – 2 shaǵynaýdanynda boı kóteredi. Bıyl qurylysy bastalatyn arena aýmaǵy – 21 gektar, 35 myń kórermenge arnalǵan. Stadıon qurylysyn 2026 jyldyń ortasyna deıin aıaqtaý josparlanyp otyr.
Aıta keteıik, búgingi tańda qalada bir ǵana Qajymuqan Muńaıtpasov atyndaǵy «Ortalyq» stadıon bar. Bul sport nysany 1969 jyly paıdalanýǵa berilgen. Syıymdylyǵy – 18 myń oryn. Keńes kezinde «Oktıabrdiń 50 jyldyǵy» dep ataldy. KSRO chempıonattarynda Shymkenttiń «Metallýrg», «Melıorator», «Sıntez» jáne «Dostyq» klýbtary óz alańyndaǵy matchtaryn ótkizip júrdi. Keıin 2003 jyldan beri jergilikti «Ordabasy» klýbynyń negizgi arenasy boldy.
Shymkent ákimi Memleket basshysy Qasym-Jomart Toqaevqa qalanyń 2023 jylǵy áleýmettik-ekonomıkalyq damýy jóninde esep berý kezinde qalaǵa zamanaýı standartqa saı stadıon qajettiligin baıandaǵan bolatyn. Sol kezde Prezıdent bıyl jańa stadıonnyń qurylysyn bastaý týraly tapsyrma bergen edi.
