Shymkentte elden tenderge dep aqsha jınaǵan ınternet-alaıaq sottaldy
ShYMKENT. KAZINFORM — Shymkent qalasynyń qylmystyq ister jónindegi aýdanaralyq sotynda A.-ǵa qatysty qylmystyq is qaraldy. Sottalýshy Qylmystyq kodekstiń 190-baby 3-bóliginiń 4) tarmaǵymen (alaıaqtyq, ıaǵnı bótenniń múlkin birneshe ret jymqyrý) aıyptalǵan, dep habarlaıdy Shymkent qalalyq sotynyń baspasóz qyzmeti.
Sotta anyqtalǵandaı, A. 2025 jyldyń qańtar aıynda «Instagram» áleýmettik jelisindegi óziniń paraqshasy arqyly «ınvestorlar aqshalaı qarajat bergen jaǵdaıda, tender arqyly aqshalaı qarajatty kóbeıtip beretini týraly jalǵan aqparattardy jarnamalap, alaıda ol aqshany qumar oıyndarǵa jumsaǵan.
Sóıtip, jábirlenýshilerge 35 419 000 teńge kóleminde múliktik zalal keltirgen.
Sottalýshynyń kinási is boıynsha jınaqtalǵan qujattarmen dáleldendi. Prokýror sottalýshyny bas bostandyǵynan aıyrý jazasyn taǵaıyndaýdy surady.
Sottalýshy kinásin tolyq moıyndap, istegen is-áreketine shynaıy ókinish bildirip, qatań jaza taǵaıyndamaýdy surady.
«Sot, sottalýshynyń qylmystyq jaýapkershilikti jeńildetetin mán-jaılar retinde kinásin tolyq moıyndap, istegen is-áreketine shynaıy ókinish bildirgenin jáne asyraýynda jasóspirim balalaryn bolýyn eskerdi. Іs boıynsha onyń jaýaptylyǵy men jazasyn aýyrlatatyn mán-jaılarǵa qylmystyń qaıtalanýyn jatqyzdy», delingen qalalyq sottyń resmı habarlamasynda.
Sot, A.-ny QK-niń 190-baby 3-bóliginiń 4) tarmaǵymen kináli dep tanyp, oǵan 4 jyl 6 aıǵa bas bostandyǵynan aıyrý jazasyn taǵaıyndady.
Raqymshylyq zańdy qoldaný arqyly túpkilikti jazanyń merzimi úshten bir bóligine qysqartylyp, túpkilikti 4 jyl merzimge bas bostandyǵynan aıyrý jazasy taǵaıyndaldy, 14 jasqa tolmaǵan tórt balasynyń bolýyna baılanysty jazasyn óteýi 5 jyl merzimge keıinge qaldyryldy.
Іs boıynsha talap aryzdar tolyǵymen qanaǵattandyrylyp, sot úkimi zańdy kúshine endi.
Eske sala ketsek, Májilis qaraýyna telefon alaıaqtaryna tosqaýyl qoıýǵa arnalǵan qujat kelip túskenin jazdyq.
Al Batys Qazaqstan oblysynda ınternet-alaıaqtar jábirlenýshilerge 1,8 mlrd teńge zalal keltirgen.