Shymkentte el damýynyń negizgi baǵyttary qamtylǵan jańa jınaq tanystyryldy
ShYMKENT. KAZINFORM — Shymkentte Memleket basshysy Qasym-Jomart Toqaevtyń «Ádiletti qoǵamǵa shynshyl sóz» atty tańdaýly sózderiniń jınaǵy keńinen talqylandy.
«Qyzǵaldaq» kongress-holynda ótken alqaly jıynǵa zııaly qaýym ókilderi, ǵalymdar, sarapshylar, qoǵam jáne memleket qaıratkerleri, sondaı-aq bıznes pen shyǵarmashylyq sala ókilderi qatysty. Prezıdenttiń el damýyna qatysty baıypty paıymdary men tańdamaly oı-tolǵamdary jınaqtalǵan jańa basylym jınalǵandar tarapynan joǵary baǵaǵa ıe boldy.
Alqaly jıynǵa Shymkent qalasy ákiminiń orynbasary Sársen Quranbek moderatorlyq etti. Ol óz sózinde Prezıdenttiń ár jyldardaǵy sózderin tutas dınamıkada kórýdiń mańyzyna toqtaldy.
Memleket basshysynyń ár kezeńdegi oı-tolǵamdary bir arnaǵa toǵysqanda, eldiń damý belesteri men betburysty shaqtary aıqyn kórinis tabatynyn atap ótti.
Jıynda J.Tashenov atyndaǵy ýnıversıtettiń Basqarma tóraǵasy, QR UǴA akademıgi Ońalbaı Aıashev bilim men ǵylymnyń mańyzyna toqtaldy. Búginde bilim el damýynyń basty basymdyǵyna aınalǵanyn aıtqan ol jastardyń mamandyq tańdaýdaǵy jáne el bolashaǵy aldyndaǵy jaýapkershiligin sóz etti. Al Shymkent qalalyq Tilderdi oqytý ádistemelik ortalyǵynyń dırektory Amangeldi Imanqulov ulttyq qundylyqtar men ana tiliniń taǵdyryna toqtaldy. Onyń aıtýynsha, ana tili — ulttyń jady men urpaqtar sabaqtastyǵynyń altyn kópiri.
Qazaqstan Jazýshylar odaǵynyń múshesi, aqyn ári aýdarmashy Abaı Qalshabek sóz qadiri men jaýapkershiligi týraly oı tolǵady. Qalamy qarymdy qalamger úshin árbir sóz — adaldyq pen shynaıylyqtyń ólshemi ekenin jetkizdi.
Basqosýda «Ádiletti qoǵam tek zańdarmen emes, azamattardyń bir-birine degen senimimen, jaýapkershiligimen qalyptasady» degen pikir jıi aıtyldy. Táýelsizdik jyldaryndaǵy el salǵan sara jolǵa úńilsek, qoǵam men ekonomıka qansha ózgergenimen, ádilettilik, zańdylyq pen bilim sapasy árdaıym basty orynda qala bermek.
Basylymda ádilettilik, zań ústemdigi, ulttyq biregeılik, bilim, tsıfrlandyrý jáne ekologııalyq mádenıet sııaqty 21 negizgi baǵyt qamtylǵan. Qatysýshylardyń aıtýynsha, jınaq zamanaýı memlekettik saıasattyń negizgi baǵdarlaryn aıqyndap beredi. Kitaptyń jastar, memlekettik qyzmetshiler men Ulttyq quryltaı depýtattary úshin de mańyzy zor.
Jıyn barysynda Qazaqstannyń eńbek sińirgen zańgeri, professor Beket Turǵaraev ta júrekjardy lebizin bildirdi:
— Bul — Memleket basshysynyń kópjyldyq eńbegi men el damýyna qatysty qundy oılary jınaqtalǵan óte mańyzdy eńbek. Kitapty zor yqylaspen oqyp shyqtym. Áriptesterime, dostaryma jáne balalaryma «Ádiletti qoǵamǵa shynshyl sóz» kitabyn oqýdy júktedim, tipti ár shańyraqtyń ústel ústi kitabyna aınaldyrýdy usyndym, — dedi ol.
Aıta ketý kerek, Prezıdent kitaby buǵan deıin Almaty, Atyraý, Pavlodar, Qaraǵandy jáne Soltústik Qazaqstan oblystarynda talqylanǵan bolatyn. Sharanyń «Qyzǵaldaq» kongress-holynda ótýiniń de ózindik mańyzy bar. 2025 jyldyń sáýir aıynda Shymkentke jasaǵan sapary kezinde Qasym-Jomart Toqaev bul ǵımaratqa «Qyzǵaldaq» ataýyn berý usynysyn qoldaǵan edi. Búginde shahardyń basty mádenı ortalyǵyna aınalǵan bul saraıda ult bolashaǵy men ádilettilik jaıynda salmaqty oılar aıtyldy.
Jıyn sońynda qatysýshylar ózara pikir almasyp, usynystaryn ortaǵa saldy.
